खाद्य तथा पोषण सुरक्षा रणनिति योजना निर्माणके लाग पूर्व तयारी बैठक

पहुरा समाचारदाता
हसुलिया, २६ माघ । कैलारी गाउँपालिकाके खाद्य तथा पोषण सुरक्षा रणनिति योजना निर्माणके लागके विफेक रोज हसुलियामे पूर्व तयारी बैठक हुइल बा ।

कैलारी गाउँपालिकाके अध्यक्ष राजसमझ चौधरीके अध्यक्षतामे हुइल कार्यक्रममे गाउँपालिका उपाध्यक्ष भगवतीकुुमारी चौधरी, सक्कु वडाके वडा अध्यक्ष, प्रमुख प्रशासकीय अधिकृत विरबहादुर ऐर पहुना रहल रहिट । कार्यक्रममे सम्बोधन करटी गाउँपालिका अध्यक्ष राजसमझ चौधरी खाद्य तथा पोषण सुरक्षा रणनिति योजना अति आवश्यक रहल ओरसे गाउँपालिकासे यकर निर्माणमे अग्रसरता डेना बटैलै । उहाँ कहलै,‘ खाद्य तथा पोषण सुरक्षा रणनिति योजनामे खाद्य, शिक्षा, स्वास्थ्य संग्गे बहुट चिज जोरल ओरसे यी हमार सम्पतिके रुपमे रही ।’

कैलारी गाउँपालिकाके खाद्य तथा पोषण सुरक्षा रणनिति योजना निर्माणके लाग कैलारी ओ सहास नेपालके आर्थिक सहयोग रहल ओ याक नेपाल प्राविधिक सहयोग कैना कहल बा । सहास नेपाल ३ लाख रुप्या सहयोग कैना कहल बा । कलेसे गाउँपालिका अध्यक्ष ओम्ने अपुग रकम गाउँपालिकासे बेहोर्ना बटैले बा ।

कार्यक्रममे सहजीकरण करटी कैलारी गाउँपालिकाके खाद्य तथा पोषण सुरक्षा रणनिति योजना निर्माणके लाग अनुमानित १४ लाख ३ हजार ५ सय रुप्या खर्च हुइना याक नेपालके कार्यक्रम अधिकृत विनोद सिंह बटैलै ।

खाद्य तथा पोषण सुरक्षा योजनासे कृषि जैविक विविधताके संरक्षण तथा पशुपालनहे व्यवसायीकरण करके खाद्य उत्पादन ओ उत्पादकत्व वृद्धि कैना, वातावरणीय प्रदुषण, भू–क्षय लगायत प्राकृतिक, मानव सिर्जित प्रकोप तथा जलवायु परिवर्तनसे हुइना असर, जोखिमके न्यूनीकरणके लाग पूर्व तयारी योजना तथा जनचेतना अभिवृद्धि कैना, कृषि तथा गैरकृषि क्षेत्रमे आधारित उद्यम तथा पर्यटन प्रवद्र्धन करके रोजगारी सृजना तथा आर्थिक पहुँचमे वृद्धि कैना, सीमान्तकृत समुदाय, महिला, बालबालिका, किशोर किशोरी, जेष्ठ नागरिक, अपाहता तथा फरक क्षमता रहल व्यक्तिहुकनके आधारभूत स्वास्थ्य, पोषण तथा सरसफाईके अवस्थामे सुधार करके भोकमरी, कुपोषण ओ गरिबीके अन्त्य करके मातृ तथा बाल मृत्युदर शुन्यमे झर्ना लक्ष्य लेहल बा ।
ओस्टेक करके खाद्य तथा उत्पादनमुलक श्रोत, सामग्रीमे स्थानीयके पहुँच वृद्धि कैना आधारभूत पूर्वाधार (सडक, बिजुली, खानेपानी, सिंचाइ, संचार, स्थायी बजार) विकास करके गाउँबासीके आर्थिक अवस्था सुधार कैना उद्देश्य रहल याक नेपालके कार्यक्रम अधिकृत सिंह बटैलै ।

कार्यक्रममे उहाँ खाद्य तथा पोषण सुरक्षाके योजना तर्जुमा प्रक्रियामे पूर्व तयारी, योजना निर्माण प्रक्रिया ओ कार्यान्वयनबारे जानकारी डेहल रहिट । उ योजनामे गाउँपालिकाके आर्थिक सामाजिक तथा भौगोलिक अवस्था विश्लेषण करल बा । जेम्ने गाउँपालिकाके संक्षिप्त परिचय, प्राकृतिक तथा उत्पादनके श्रोतके विश्लेषण, धार्मिक तथा पर्यटकीय महत्वके स्थल, आर्थिक तथा सामाजिक सेवा सुविधा रहल बा । ओकर भिटर कृषि तथा पशुपालन विकासके अवस्था, शिक्षा क्षेत्रके अवस्था, स्वास्थ्य तथा पोषणके अवस्था, खानेपानीके अवस्था, सिचाईके सुविधा, वातावरण जोखिम तथा विपद व्यवस्थापन, पूर्वाधार (सडक,संचार तथा विजुली), बजारके पहुँचके अवस्थाफे समेटना रहल बा ।

ओस्टेक करके योजना तर्जुमा कार्यदल गाउँपालिका उपाध्यक्षके संयोजकत्वमे ११ सदस्य समिति रहना बा । जेम्ने गाउँपालिका अध्यक्ष अतिथि, प्रमुख प्रशासकीय अधिकृत अतिथि रहना ओ वडा अध्यक्षहुक्रे सदस्य रहना कहल बा । ओस्टेक टास्कफोर्स समितिफे बनागिल बा । जेम्ने संयोजकमे वडा नम्बर ५ के वडा अध्यक्ष विष्णु प्रसाद चौधरी रहल बटै । सदस्यमे वडा–३ के वडा अध्यक्ष सन्तराम चौधरी, सदस्यमे कृषि, पशु, स्वास्थ्य शाखाके प्रमुख, ओस्टेक सहास नेपालके नरेश चौधरी ओ याक नेपालके विनोद सिंह सदस्य रहना हुइल बटै ।

खाद्य तथा पोषण सुरक्षा रणनिति योजना निर्माणके लाग हुइल पूर्व तयारी कार्यक्रमके संचालन कैलारी गाउँपालिकाके सामाजिक विकास शाखा प्रमुख यगम कलेल करल रहिट । कार्यक्रममे याक नेपालके कार्यकारी निर्देशक डबल बम, सहास नेपालके टंक गौतमलगायत गाउँपालिकाके टमान शाखाके प्रमुखहुकनके सहभागिता रहल रहे ।