जनता आधारभूत विद्यालयके तीन कोठे भवनके शिलान्यास
पहुरा समाचारदाता
हसुलिया, २६ माघ । कैलारी गाउँपालिका वडा नम्बर ९ सामरचौरास्थित जनता आधारभूत विद्यालयके तीन कोठे भवनके शिलान्यास कैगिल हो ।
कैलारी गाउँपालिका ओ बिल्ड अन नेपालके सयूक्त लगानीमे विफेक रोजसे निर्माण सुरु हुइल उ भवनके शिलान्यास कार्यक्रम गाउँपालिका अध्यक्ष राजसमझ चौधरीके वरका पहुनामे हुइल रहे । बिल्ड अन नेपालसे ग्रामीण समुदायके शिक्षामे पहुँच पुगैना उद्देश्यसे सञ्चालित कार्यक्रम अन्तर्गत आवश्यक्ता पहिचान करके विद्यालयके भौतिक पूर्वाधार निर्माण सहयोग कार्यान्वयनके लाग माघ २५ गतेसे निर्माण सुरु हुइल हो । , तीन कोठे भवनसंगे दुई कोठे शौचालय निर्माण कैजिना बा ।
कार्यक्रममे सम्बोधन करटी गाउँपालिका अध्यक्ष विद्यालयके भवन निर्माणसंगे आब विद्यार्थी टिकैनाओर ध्यान डेना आग्रह करलै । उहाँ कहलै, ‘सामुदायिक विद्यालयमे विद्यार्थीके संख्या न्यून हुइटी गैल ओरसे अभिभावक शिक्षा डेहे सुरु करल बा । सामुदायिक विद्यालयमे सैद्धान्तिकसंगे व्यवहारिक शिक्षा डेजैटी रहल बा । मने संस्थागत विद्यालयमे घोकैनामे ढेर ध्यान डेहल बा ।’
अब्बेक आवश्यकता व्यवहारिक ओ सैद्धान्तिक शिक्षा हो,’ गाउँपालिका अध्यक्ष कहलै, ‘पहिले तुल्नामे अब्बे हेरी समाज केहोर जाइटा ओकर आकलन करेसेक्ठ ।
बिल्ड अन नेपालसे सहकार्य करके गाउँपालिकासे वडा नम्बर १ मनाउ, वडा–७ रामपुरमे विद्यालय भवन सम्पन्न करल ओ अब्बे वडा–४ के गाउँ ओ वडा–९ सामरचौरामे निर्माण सुरु हुइल ओ दुनु भवन १०६ दिनमे सम्पन्न हुइना उहाँ बटैलै । ओस्टेक करके जनता आविके अधुरा भवनसे अइना आर्थिक बर्षमे बजेट छुत्यइना प्रतिवद्धताफे जनैलै ।
गाउँपालिका अध्यक्ष जनताके मर्का बुझटी आधा मोलपोट घटाइल, सुत्केरी महिला बाहेर जाई परलेसे निशुल्क एम्बुलेन्सके सुविधा, सिकलसेल तथा रगतके आवश्यकता परल रोग्हयाहुकनहे निशुल्क रगतके व्यवस्था करल उहाँ बटैलै ।
वडा नम्र ९ वडा अध्यक्ष खेमराज चौधरी निर्माण सुरु करल भवन समयसमे सम्पन्न हुइना बटैलै । वडा कार्यालयसे भ्याइल बजेटसे जनताके छोट–छोट माग पुरा कैना भारी योजनाके लाग प्रदेश ओ संघीय सरकारसे पहल कैना उहाँ बटैलै ।
कार्यक्रमके विशिष्ट पहुना नेपाली काँग्रेस कैलारी गाउँपालिका सभापति कृष्ण प्रसाद चौधरी भौतिक संगे आब सामाजिक विकास कैना जरुरी रहल बटैलै । गाउँ ठाउँके विकास होए कना जनताके ढेर आपेक्ष हुई सेकठ, योजना तर्जूमाके बेला अपन माग रख्ना उहाँ आग्रह करलै ।
समाजसेवी गरिबदास चौधरी जनता आधारभूत विद्यालयके भवन बनैनाफे ठाउँ नइरहल ओ रहल भवन जिर्ण हुइल बटैलै । उहाँ कहलै, अधुरो भवनहे सम्पन्न करेसेक्लेसे विद्यार्थीनके पठनपाठनमे कौनो समस्या नइअइना बटैलै ।
बिल्ड अन नेपालके इन्जिनियर मनोज चौधरी ३ कोठे पक्की भवन तथा दुई कोठे पक्की शौचालयकेलाग अपनेहुक्रे इंटा, सिमेन्ट, सरीया, कीलाकांटा, रंगरोगन, प्लास्टिक, फलामके भ्याल÷पल्ला÷भेन्टिलेशन, ढोका फिटिङके सामग्री, छत ढलानके लाग सट्टिङ, मिक्चर मसिन, फर्मा, बेल्चा, तसला, डोरी, जाली, काठके ढोका बनैना मिस्त्री खर्च उपलब्ध कैना बटैलै ।
विल्ड अन नेपालसे विद्यालय भवन तथा शौचालय निर्माणके लाग दक्ष जनशक्ति उपलब्ध कैनाफे उहाँ बटैलै ।
गाउँपालिकासे विद्यालय भवन तथा शौचालय निर्माणके लाग लग्ना सामाग्री ( वालुवा, गिट्रिट, ढुंगा, ढोकाके लाग काठ कुछ अदक्ष कामदार, वाईरिङ) तथा अन्य लागत अनुमान बरावर वापतके रकम उपलब्ध कराई पर्ना बा ।
ओस्टेक करके समुदायसे जनश्रमदान, छत ढलान बाहेक अन्य ठाउँमे प्रयोग हुइना सटरिङके सामग्री ओ स्थानीय रुपमे प्रयोग हुइन सामग्री कोदरा, हसिया, टेङगारी,बाउसा, पानी डरना बाल्टी, मोटर, इम, धागा, चुना आदि) समुदायसे ब्यहोरे पर्ना बा । तीन कोठे भवन ओ दुई कोठे चर्पी निर्माणके लाग गाउँपालिकासे ६ लाख, बिल्ड अन नेपालसे २९ लाख ९८ हजार २४ रुप्या ९८ पैसा ओ समुदायके जनश्रमदान ७ लाख ७८ हजार १ सय ५९ रुप्या करके जम्मा लागत ४३ लाख ७६ हजार १८४ रुप्या ३२ पैसा रहल बा ।
विद्यालय व्यवस्थापन समिति अध्यक्ष रुपा चौधरीके अध्यक्षतामे हुइल कार्यक्रमके संचालन विद्यालयके प्रअ रामबाबु चौधरी ओ स्वागत शिक्षिका गुनपति चौधरी करल रहिट । कार्यक्रममे बिल्ड अन नेपालके फिल्ड संयोजक शिवराज राना, विद्यालयके शिक्षक, अभिभावक ओ टमान राजनितिक दलहुकनके सहभागिता रहल रहे ।
