कैलारीमे सिकलसेल एनिमिया तथा थाइलेसिमिया स्क्रिनिङ निःशुल्क शिविर सुरु
पहुरा समाचारदाता
हसुलिया, २६ माघ । कैलारी गाउँपालिका वडा नम्बर ६ बनकट्टा आधारभूत स्वास्थ्य केन्द्रमे शुकके रोजसे सिकलसेल एनिमिया तथा थाइलेसिमिया स्क्रिनिङ, अनुसन्धानके लाग निःशुल्क स्वास्थ्य शिविर सुरु हुइल बा ।
कैलारी गाउँपालिकाके आयोजना तथा निमेष सामुदायिक अस्पताल तथा सिकलसेल रोग अनुसन्धान केन्द्र कृष्णपुर–५ कञ्चनपुरके सहआयोजनामे सिकलसेल तथा थालेसिमिया रोग सम्बन्धी निशुल्क रक्त परीक्षण शिविर ओ सेती प्रादेशिक अस्पताल कैलालीके आयोजना ओ कैलारी गाउँपालिकाके समन्वयमे सिकलसेल एनिमिया तथा थाइलेसिमिया सम्बन्धी समुदायस्तरमे स्क्रिनिङ अनुसन्धानके लाग निशुल्क स्वास्थ्य शिविर कार्यक्रम सुरु हुइल हो । यी शिविर सक्कु वडामे दुई दुई दिन संचालन हुइना बा ।
कैलारी गाउँपालिका अध्यक्ष तथा कार्यक्रमके वरका पहुना राजसमझ चौधरी उ शिविरके एक कार्यक्रमके विच उदघाटन करल रहिट । कार्यक्रममे सम्बोधन करटी उहाँ सिकलसेल रोगबारे जनसमुदायहे जानकारी नइरहल बटैलै । उहाँ खास करके थारु समुदाय प्रभावित हुइल कहलै ।
भोज कैना पहिले जनम कुण्डली हेर्ना चलन बा,’ उहाँ कहलै, मने आब दुल्हा दुल्हनिया सिकलसेल पोजेटिभ बा कलेसे उहीहे रोकी । नइरोक्लेसे बच्चाफे सिकलसेल वाला जन्मही ।’ सिकलसेल रहल घरपरिवार ओ यकर लक्षण विल्गैलेसे चेकजाँच कैना जरुरी रहल अध्यक्ष बटैलै ।
सिकलसेलके विमारीहे सेतीमे उपचारके लाग गैलेसे पालिकासे यातायात खर्च वाफत १ हजार डेटी रहल बटैलै । कलेसे उदासीपुर आधारभूत स्वास्थ्य केन्द्रमेफे चेकजाँच करटी रहल बटैलै । कैलारीके प्रत्येक वडामे दुई–दुई चेकजाँच हुइना ओरसे स्वास्थ्यकर्मीहे प्रचार प्रसारके मजा कैना ओ भल्मन्साहुकनसेफे समन्वय करके आघे बह्रना बटैलै ।
सेती प्रादेशिक अस्पताल व्यवस्थापन समितिके अध्यक्ष नरबहादुर शाह सिकलसेल अक्रान्त समस्याके रुपमे डेखा परल बटैलै । अब्बेक तथ्याङक हेरेबेर कैलाली ओ कञ्चनपुरमे करिब १२ सय जनहनहे यी रोग लागल उहाँ बटैलै । अब्बेफे गुरुवा, भुत लागल विश्वास करजैटी रहल बटै,’ उहाँ कहलै, एकाइसौ शताब्दीमे आब यसिन अन्धविश्वासके पाछे दौरे नइपरल । अभिनफे जनचेतनाके कमी बा । यकर बारेमे गाउँ गाउँ टोल प्रचार कैना जरुरी बा ।
धनगढीके १५ ओ १६ नम्बर वडाके ३०० जानेक चेकजाँच करेबेर ५२ जनहनमे पोजेटिभ डेखल उहाँ बटैलै ।
कैलारी गाउँपालिकाके स्वास्थ्य शाखा प्रमुख नरेश चौधरी करिब ८ हजार जानेक सिकलिङ टेस्ट कैना लक्ष्य लेहल बटैलै । कैलारी गाउँपालिकामे अब्बे १०१ जाने नियमित उपचारमे रहल कहटी जै चो सेतीमे उपचार कराई जैना ओइनहे प्रत्येक बार एक हजार रुप्या यातायात खर्च डेटी रहल जनैलै । नियमित रुपमे उपचार करैटी रहल विमारीके निशुल्क स्वास्थ्य विमा करलफे जनैलै । यी बरस कक्षा ८ से १२ सम पह्रना सक्कु विद्यार्थीनहे सिकलसेल जनचेतनाके साथे भल्मन्साहुकनसेफे कार्यक्रम चलाइल बटैलै । उदासीपुर आधारभूत स्वास्थ्य केन्द्रमे पोहोर सालसे सिकलसेल जाँच सुरु करल जनैलै ।
कार्यक्रममे सेती प्रादेशिक अस्पतालके सामाजिक सेवा इकाईके संयोजक गौरी जोशी सिकलसेल रोग जाँचसे बञ्चित ओ जेकरमे लक्षण विल्गाइल बा ओइनहे लक्षित करके यी शिविर संचालन करल बटैलै । प्रदेश सरकारसे सहयोग प्राप्त हुइलपाछे जौन समुदायमे ढेर डेखा परल हो उ समुदायके चेकजाँच आघे बह्राइल बटैलै ।
समयमे रोग पत्ता लग्लेसे विपन्न नागरिक कोषसे पैना एक लाख रुप्याके सुविधा लेहे सेक्ना कहल बा । ओ समयमे उपचार पैना बटैलै । सिकलिङसे पोजेजिभ विल्गैलेसे फेरसे सेती प्रादेशिक अस्पतालमे लैजाके जाँच कैना बटैलै ।
कार्यक्रमके अध्यक्ष तथा वडा नम्बर ६ के वडा अध्यक्ष प्रेमबहादुर चौधरी चेकजाँचसे छुटल सक्कु जनहनहे सहभागी करैना बटैलै । उहाँ कहलै, पहिलेफे चेकजाँच हुइल रहे । ओम्ने बहुट जैसिन छुटल बटै अवसिक शिविरमे सक्कु जनहनहे समेटना प्रयास करब ।
