कैलारीके बनकट्टामे शान्ति संग्राहलयके समुदघाटन

पहुरा समाचारदाता
धनगढी, २६ माघ । कैलाली जिल्लाके कैलारी गाउँपालिका वडा नम्बर ६ बनकट्टामे शान्ति संग्राहलयके उदघाटन करल बा ।

कैलारी गाउँपालिका वडा नम्बर ६ के आर्थिक सहयोगमे द्वन्दकालमे ज्यान गुमाइल पीडित परिवारके दुखसुखके बाटचित कैना छौंरीके रुपमे शान्ति संग्राहलयके निर्माण करल हो । उ संग्राहलयके उदघाटन सुदूरपश्चिम प्रदेश सरकारके आन्तरिक मामिला तथा कानून मन्त्री माननीय शिवराज भट्ट करल रहिट । कार्यक्रममे सम्बोधन करटी उहाँ नेपालके संविधानमे सक्कुहुनहे बराबर हक प्रदान करल मने अभिनफे महिलाहे हेर्ना दुष्टिकोण फरक रहल ओ पुरुष प्रधान हुइल ओरसे ठोरिक फरक दृष्टिसे हेरजाइठ ।

एकल महिलाहे अब्बे समस्या बा,’ मन्त्री भट्ट कहलै, ‘कमैना मनै नइरहल आोरसे बालबच्चाहे कैसिक हुर्कैना, कैसिक शिक्षादिक्षा डेना यावत समस्या रहठ । दुसर ओर अपने प्रियजन घरके मनैनसे दुख पिडा डेहल विल्गाइठ । जेकर कारण महिला गलत निर्णय लेहल विल्गाइठ ।’

उहाँ कहलै, ‘निश्चित रुपमे ढेर गाह्रो अप्ध्यारा बा । कानूनमे एकल महिलाहे टमान मेरके सेवा सुविधा डेना कहल बा । मने उ उपयुक्त नइहुई । ओकर लाग प्रदेश सरकार का सम्बोधन करे सेकठ प्रतिवद्ध बा ।’

प्रदेश सभा सदस्य खिमा विष्ट अपने १४÷१५ बर्षसे एकल महिलाके लाग आवाज उठैटी आइल ओ अब्बे एकल महिलाहुकनहे अधिकार चाहल बटैली । आब ठोर ठोर राहत डेके नइपुगी जियक लाग अधिकार चाहल बा,’ उहाँ कहली, ‘अब्ब्े टमान क्षेत्रमे कोटाके व्यवस्था करल रहठ राजनितिक क्षेत्रलगायत हरेक तहमे एकल महिलाके कोटा छुटयाई परल । अपने एकल महिलाके बालबालिकाके उच्च शिक्षाके व्यवस्था करे पर्ना बाटफे सदनमे उठैटी आइल बटैली ।

कैलारी गाउँपालिकाके अध्यक्ष राजसमझ चौधरी बनकट्टामे नमूना ओ एैतिहासिक रुपमे शान्ति संग्राहलय स्थापना हुइल बटैलै । नेपालमे द्वन्द कैलारी गाउँपालिकाके वडा नम्बर ३ से सुरुवाट हुइल हो,’ उहाँ कहलै,‘सशस्त्र द्वन्दकालके तथ्याङक हेरेबेरफे कैलारी गाउँपालिका सबसे प्रभावित हुइल बा । ओम्ने ढेर जाने ज्यान गुमैलै, दिडीबहिनी अभिभावक विहिन बन्लै । ओकर परिपुरण ओ सुखदुखके बाट रख्ना छहारीके लाग यी संचरना निर्माण करल हो ।’ एकल महिलाहे अधिकार डेना नीति बनाके आघे बह्रना उहाँ बटैलै । कैलारी गाउँपालिकासे द्वन्दकालमे अकालमे ज्यान गुमाइल शहिदहुकनके नाउँमे डगरघाटके नामाकरण करल अध्यक्ष बटैलै ।

कैलारी गाउँपालिका वडा नम्बर ६ के वडा अध्यक्ष प्रेमबहादुर चौधरी बनकट्टा शान्ति संग्राहलय स्थापना करेबेर २०७४ सालके अनुभव सुनैटी एकल महिलाके पीडा कैसिक राज्यसँग पुगैना ओर लागल ओ आज सफल हुइल बटैलै ।
समाजमे हेरेबेर उहाँहुकनके आर्थिक अवस्था एकदम कम्जोर रहे,’ उहाँ कहलै, ‘सामाजिक, राजनितिक तवरसे पहुँच नइपुगल अवस्था हेरेबेर मै अपने निर्वाचित हुइबेर एकल महिलाहे संगठित कैना, उहाँहुकनके आवाजहे उप्पर उठैना एकल महिलाके लाग भवन बनैना पहल करल जौन आज शान्ति संग्राहलय बनल ।’

राष्ट्रिय मानव अधिकार आयोग सुदूरपश्चिम प्रदेश प्रमुख हरिप्रसाद ज्ञवाली सरकार तत्कालिन विद्रोही पक्षसँग करल सहमति अभिनफे कार्यान्वयन नइहुइल बटैलै । द्वन्दकालमे आफन्त गुमाके एकल हुइल महिलाके पीडा ढेर बा,’ उहाँ कहलै’ ‘एकल महिला पीडाके विच बाँच्न बाध्य बटेै । राज्यसे कैना काम उहाँहुकनके सम्मान पहिचान करे परठ । शान्ति संग्राहलय उहाहुकनके मन शान्त कैना भारी राहत पुगैना बा ।’

कार्यक्रमम जर्मनके पिटर द्वन्दकालमे आफन्त गुमाइल परिवारसे पीडा सहके बाँचल बटैलै । उहाँ कहलै पीडितके बालबच्चा अभिभावक गुमैलै । अभिनफे अभावके जीवन जिना बाध्य बटै । ओकर लाग राज्य गम्भीर हुइना आवश्यक बा ।
कार्यक्रममे मानव अधिकारका लागि महिला एकल महिला समुहके केन्द्रीय अध्यक्ष कविता पाडे एकल महिला आब एकजुट हुके अइना जरुरी रहल बटैली । कैलारी गाउँपालिकामे स्थापना हुइल यी शान्ति संग्राहलय एकल महिलाके शक्तिके रुपमे स्थापना हुइल बटैली । अस्टे छहारी और ठाउँमेफे स्थापना हुइल ओ ओम्ने एकल महिलासे सुखदुखके बाट विसैना स्थल बनल बटैली ।

कार्यक्रम मानव अधिकारका लागि महिला एकल महिला समुह सुदूरपश्चिम प्रदेश अध्यक्ष सुमन शर्माके अध्यक्षतामे हुइल रहे । कलेसे सहजीकरण शान्ति परियोजना अधिकृत वेद अवस्थी ओ स्वागत मन्तव्य मानव अधिकारके लाग महिला एकल महिला समुहके केन्द्रीय सदस्य भगवती हमाल करल रहिट ।

कैलारी गाउँपालिकामे सशस्त्र द्वन्दकालमे ७८ जाने ज्यान गुमैले बटै । उ संग्राहलय मानव अधिकारका लागि महिला एकल महिला समुह सुदूरपश्चिम प्रदेशके पहलमे निर्माण हुइल हो । जेम्ने पीडित परिवारके विवरणफे धारगिल बा ।