गुणस्तरीय शिक्षा ओ शिक्षकके मागप्रति सदैव तत्पर बटीः गाउँपालिका अध्यक्ष

पहुरा समाचारदाता
हसुलिया, २७ माघ । नेपाल शिक्षक संघ कैलारीके पाँचौं प्रतिनिधि सभा कार्यक्रम शनिच्चरके रोज हसुलियामे सम्पन्न हुइल बा । कैंलारी गाउँपालिका अध्यक्ष राजसमझ चौधरीके बरका पहुनामे हुइल कार्यक्रममे नेपाली काँग्रेसके महासमिति सदस्य पुरन प्रसाद चौधरी, नेपाल शिक्षक संघ सुदूरपश्चिम प्रदेश अध्यक्ष डिल्लीराज पन्त ओ संघके जिल्ला अध्यक्ष तेजबहादुर सिंह विशिष्ट पहुना रहल रहिट ।

कार्यक्रममे सम्बोधन करटी कैंलारी गाउँपालिका अध्यक्ष तथा बरका राजसमझ चौधरी अपने निर्वाचित हुके आइलपाछे शिक्षाहे महत्वके साथ हेरटी रहल बटैलै । उहाँ कहलै, ‘आघेक जनप्रतिनिधिके पालामे शिक्षा क्षेत्रमे कैलारीमे १ करोड ४० लाख केल बजेट छुटयइटी आइल रहे । हमार पालामे २ करोड २५ लाख बजेट विनियोजित करके शिक्षाहे महत्वके साथ हेरटी बटी ।’
गाउँपालिकासे गुणस्तरी शिक्षासंगे जिर्ण भवनके मर्मत सम्हार ओ अधुरा भवनके निर्माण पुरा कैटी रहल उहाँ बटैलै ।

ढेर जैसिन विद्यालयमे अभिन भवनके कमी बा,’ गाउँपालिका अध्यक्ष कहलै, ‘भवनके अभाव रहल विद्यालयमे दातृ निकायसे समन्वय करके विद्यालय भवन निर्माण करटी । जहाँ विद्यार्थी कम बटै कलेसे विद्यालय मर्जफे कैगिल बा ।’
गाउँपालिकासे शिक्षाके अवस्था बुझना वडा अध्यक्ष समिति तीन ठो समिति निर्माण करल ओ ओइने अनुगमन करके नानल समस्याहे गाउँपालिकासे ठप सुधारओर लागलफे उहाँ बटैलै ।

कैलारी गाउँपालिकामे ९०÷९५ प्रतिशत कृषक रहल ओ यहाँ बाढ डुबानसे खेतीपाती नोक्सान हुके किसान मर्कामे परल कहटी मालपोत आधा तिर्ना कहलपाछे गाउँपालिका आम्दानीके स्रोत घटल बटैलै । गाउँपालिकासे शिक्षकहुकनके मनोबल गिर्ना कौनो काम नइकैना ओ ओइनके माग पुरा कैना पाछे नइपर्ना बटैलै ।

नेपाल शिक्षक संघ सुदूरपश्चिम प्रदेश अध्यक्ष डिल्लीराज पन्त शिक्षकहुक्रे अपन पेशागत सुरक्षाके ग्यारेन्टीके करल आन्दोलन सरकार पुरा नइकरल बटैलै । उहाँ कहलै, सरकार शिक्षा ऐन नन्नामे ढिलाई करटी रहल ओरसे दवाद डेना आवश्यक बा ।’
संघ जिल्ला अध्यक्ष तेजबहादुर सिह नेपाल शिक्षक संघ कैलारी पाँचौ प्रतिनिधि सभा कार्यक्रम कैना सफल हुइल कहटी धन्यवाद ज्ञापन करल रहिट । उहाँ कहलै, कैलालीमे १३ पालिका मन्से आउर पालिका अभिन प्रतिनिधि सभा कार्यक्रम नइकरले हो । कैलारीसे माघ महिनामे कैना कहल प्रगतिओर लम्कल विल्गाइल बा ।’

नेपाली काँग्रेसके महासमिति सदस्य पुरन प्रसाद चौधरी यिहीसे आघेक जनप्रतिनिधिके पालामे निजि शिक्षक ढेर समस्या भोगे परल बटैलै । ढेर शिक्षकके रोजरोटी गैलफे बटैलै । अब्बे सामुदायिक विद्यालयमे विद्यार्थी टिकैना कर्रा हुइल ओरसे अभिभावकफे सोचे पर्ना बटैले बटै ।

नेपाल शिक्षक संघ कैलालीके अर्थ सचिव देवराज जोशी शिक्षक समस्या स्थानीय तह, प्रदेश ओ संघीय सरकारसे बुझना जरुरी रहल बटैलै । संघके जिल्ला सदस्य मदन प्रसाद पौडेल अपनेहुक्रे शिक्षकहुकनके माग सम्बोधनके लाग ज्ञापनपत्र बुझाइलमे टमान माग पुरा ओ बाँकी मागफे सम्बोधनके लाग आग्रह करलै ।

कार्यक्रममे वडा नम्बर ३ के वडा अध्यक्ष सन्तराम चौधरी, नेपाली काँग्रेसके महाधिवेशन प्रतिनिधि तथा कैलारी गाउँपालिकाके प्रवक्ता वडा नम्बर ७ के वडा अध्यक्ष दिपेन्द्र बहादुर बम स्थानीय सरकारसे करल कामबारे शिक्षकफे अपन ठाउँसे जानकारी करैना बटैलै । गाउँपालिकासे प्रदान टमान सेवा सुविधाबारे अभिन जनता पत्ता नइपैले हुइट, ओकरबारेफे जानकारी करैना आवश्यक बा ।

नेपाली काँग्रेस कैलारी गाउँपालिका सभापति कृष्णप्रसाद चौधरी शिक्षकहु्कनके आवश्यकता पुरा कैना अब्बेक सरकारसे ढेर ध्यान डेहल बटैलै । उहाँ कहलै, ‘कौनो विद्यालयके समस्या बा, तलब खाई नइसेक्ना अवस्था बा कलेसे समयमे जानकारी करलेसे ओकर समाधान कैना पाछे नइहटब ।’

नेपाली काँग्रेसके महाधिवेशन प्रतिनिधि मनिराम चौधरी शिक्षक संघहे बल्गर बनैना पार्टी लागल बटैलै ।
कार्यक्रममे दिपेन्द्र माविके प्रअ विनोद भट्टराई गाउँपालिकासे शिक्षकके माग सम्बोधन कैनामे अग्रसर रहल बटैलै । उहाँ कहलै, ‘ढेर जैसिन विद्यालयके भवन जिर्ण हुके पठनपाठनमे समस्या रहे । अब्बेक स्थानीय सरकारसे मर्मत सम्हार कैले बा ।’

कार्यक्रममे नेपाल शिक्षक संघ कैलारीसे सेवा निवृत शिक्षक वेचन महतों, माया चौधरी ओ लालबहादुर चौधरीहे दोसल्ला सहित सम्मान करले बा । ओस्टेक टमान विद्यालयके प्रअ हुकनफे कदरपत्रसे सम्मान करले बा ।

नेपाल शिक्षक संघ कैलारीके अध्यक्ष सन्तोष चौधरीके अध्यक्षतामे हुइल कार्यक्रममे बार्षिक प्रगति विवरण सचिव पुरन चौधरी प्रस्तुत करल रहिट । कार्यक्रममे स्वागत मन्तव्य संघके उपाध्यक्ष विना चौधरी ओ संचालन वृक्षलाल चौधरी करल रहिट । कार्यक्रममे वडा नम्बर १ के वडा अध्यक्ष धोजहरिपाल बोहरा, वडा नम्बर ४ वडा अध्यक्ष ठागुराम चौधरी, वडा नम्बर ५ वडा अध्यक्ष विष्णु प्रसाद चौधरीलगायत नेपाल शिक्षक संघके प्रतिनिधि, वडा सदस्यहुकनके सहभागिता रहे ।

यिहे विच नेपाल शिक्षक संघसे गाउँपालिका अध्यक्ष राजसमझ चौधरीहे ४ बुँदे मागसहितके ज्ञापनपत्र बुझैले बा । उ मागमे सामुदायिक विद्यालयमे कार्यरत निजि स्रोतके शिक्षकहुकनहे गाउँपालिका शिक्षकमे नियूक्ती करके उचित तलब स्केल तथा सेवा सुविधाके व्यवस्था करे पर्ना, स्थानीय भाषा शिक्षकहुकनहे गाउँपालिकासे नियूक्ती पत्रके व्यवस्था करटी समयमे तलब भत्ताके व्यवस्था करे पर्ना, सामुदायिक विद्यालयहे बालमैत्री बनैना सफा स्वच्छ आर्कषण केन्द्रके योजनासहित आर्कषक कार्ययोजना लागु कैना पहल करेपर्ना ओ शिक्षकहुकनके क्षमता विकासके लाग शिक्षकके मागमे आधारित शिक्षक तालिम एवं तालिम भत्ता वाफत रकम नेपाल सरकारसे तोकल बमोजिम व्यवस्था करेपर्ना मागसहिट संघके अध्यक्ष सन्तोष चौधरी ज्ञापनपत्र हस्तान्तरण करल रहिट ।