थारु कलाकार मञ्चके केन्द्रिय अध्यक्षमे विनय वैद्य

पहुरा समाचारदाता
धनगढी, २८ माघ । राष्ट्रिय थारु कलाकार मञ्चके पहिल महाधिवेशनसे अध्यक्षमे वीरबहादुर चौधरी (विनय वैद्य) सर्वसम्मत चयन हुइल बटैं ।

शनिच्चरसे सौराहामे सुरु हुइल अधिवेशनसे अध्यक्ष चौधरीसहित १७ सदस्यीय कार्यसमिति फेन सर्वसम्मत चयन हुइल हुइट । कार्यसमितिके अन्य पदाधिकारीमे क्रमशः वरिष्ठ उपाध्यक्षमे रोशन रत्गैंया चौधरी (दाङ), उपाध्यक्षमे लक्ष्मीकान्त चौधरी (बारा) ओ समीक्षा चौधरी (कैलाली), महासचिवमे बिजयकुमार चौधरी (सप्तरी), सचिवमे राधा कृष्ण (आरके) चौधरी (बर्दिया) ओ अनुमा चौधरी (उदयपुर), कोषाध्यक्षमे अन्जु चौधरी (काठमाडौं) चयन हुइल बटैं ।

ओस्टके सदस्यमे क्रमशः राज कुश्मी (बर्दिया), सोनु कुश्मी (कैलाली), मनिष चौधरी (सिरहा), अमृता चौधरी (बाँके), नरेश जोगी (कैलाली), वीरबहादुर चौधरी (कैलाली), अञ्जु चौधरी (कैलाली), गणेश चौधरी (रुपन्देही) ओ राजनकुमार चौधरी (रौतहट) चयन हुइल बटैं ।

महाधिवेशनके भुमि व्यवस्था सहकारी तथा गरिबी निवारणमन्त्री रञ्जिता श्रेष्ठ उद्घाटन करल रही । नवनिर्वाचित अध्यक्ष चौधरीके अनुसार मञ्चके २६ जिल्लामे कार्य समिति गठन हुइल बा ।

महाधिवेशनके लाग संगठन विस्तार हुइल जिल्लासे पाँच जाने प्रतिनिधि ओ एक जाने पर्यवेक्षक सहभागी रहल उहाँ बटैलै । पाँच बरस आघे गठन हुइल मञ्चसे संगठन बिस्तार कैनाके साथे नेतृत्व विकास, थारु भाषा, कला ओ संस्कृतिके संरक्षण, संवद्र्धन कैना ओ थारु समुदायमे रहल प्राचीन सम्पदा बचैनामे फेन सक्रिय रहल उहाँ बटैलै ।