आत्महत्या दुरुत्साहन मुद्दामे कोट्टारीहे चार वर्ष कैद

पहुरा समाचारदाता
धनगढी, १ फागुन । कैलालीमे शिक्षिकाके आत्महत्या दुरुत्साहन मुद्दाके अभियुक्तहे चार वर्ष कैद सजाय सुनाइल बा ।
धनगढीके दिपेन्द्र प्रहरी स्कुलके शिक्षिका राजेश्वरी डडालके आत्महत्या दुरुत्साहन सम्बन्धी मुद्दामे जिल्ला अदालत कैलालीसे उहाँक प्रेमी जगदिश कोट्टारीहे चार वर्ष कैद सजाय हुइना फैसला करल हो ।
जिल्ला अदालतके न्यायाधीश प्रदीपकुमार उपाध्यायके इजलाशसे २६ माघमे फैसला करटी कोट्टारीहे चार वर्ष कैद ओ ४० हजार रुप्या जरिवाना हुइना फैसला सुनाइल श्रेस्तेदार मानबहादुर विष्ट जानकारी डेलै । उहाँक अनुसार मृतकके परिवारहे अभियुक्तसे एक लाख रुप्या क्षतिपूर्ति भरैना आदेश समेत डेहल बा ।
दार्चुलाके मार्मा गाउँपालिका–६ सिरोली स्थायी घर रहल राजेश्वरी धनगढीके दिपेन्द्र प्रहरी स्कुलमे पढैटी आइल रहिट । उहाँ गैल भदौ ६ गते धनगढी उपमहानगरपालिका–३ मे झुलल अवस्थामे मृत भेटल रहिट । जगदिश अपनसंग भोज कैना कहटी प्रेम करल मने अब्बे आके धोका डेहल कहटी आत्महत्याके डगर रोजल उहाँ लिखल सुसाइड नोटमे उल्लेख करल रहिट । राजेश्वरीके मृत्युपाछे भदौमे उहाँक बाबक राजेन्द्रसिंह डडाल जिल्ला प्रहरी कार्यालय कैलालीमे जगदिशविरुद्ध छाईहे आत्महत्या कैना बाध्य पारल कहटी आत्महत्या दुरुत्साहनमे किटानी जाहेरी डेहल रहिट ।
