जानकीमे दुई दिने ढिक्री बनैना तालिम

पहुरा समाचारदाता
धनगढी, ७ फागुन । कैलाली जिल्लाके जानकी गाउँपालिकासे थारु महिलाहुँक्रनहे अँटवारसे दुई दिने ढिक्री बनैना तालिम डेहे लागल बा ।

‘शिक्षा स्वास्थ्य कृषि ओ वातावरणमैत्री पूर्वाधार, पहिचानसहितके जानकी गाउँपालिकाके विकासके मुल आधार कना मुल नाराके साथ तराई मधेश समृद्धि कार्यक्रम अन्र्तगत दुई दिने ढिक्री बनैना तालिम सुरु हुइल हो । तालिमके उदघाटन गाउँपालिका अध्यक्ष गणेश चौधरी ओ उपाध्यक्ष लालमति देवी कठरिया करल रहिट ।

जानकी गाउँपालिकासे कार्यालयमे नाष्टाके रुपमे थारु परिकार ढिक्री ओ स्थानीय परिकार सेलरोटी समावेश करल गाउँपालिका उपाध्यक्ष कठरिया बटैली ।

उहाँ कहली, ‘हम्रे निर्वाचित हुके आइलपाछे पालिकाके कौनोफे कार्यक्रमम थारु परिकार ढिक्री टिनाक साथे स्थानीय परिकार सेलरोटी रहठ । बजारके प्याकिङ नाष्टा बन्द करल बटी । थारु परिकारहे प्रवद्र्धन करक लाग यी ताालिमके संचालन हो ।’ गाउँपालिकाके आयोजनामे सुरु हुइलक तालिम सोम्मारसम चल्ना उहाँ जनैली ।