ग्यालेक्सी माविके ३०औं वार्षिकोत्सव

पहुरा समाचारदाता
धनगढी, ७ फागुन । धनगढी उपमहानगरपालिका–५ हसनपुरस्थित ग्यालेक्सी माविके ३०औं वार्षिकोत्सव तथा अभिभावक दिवस एक भव्य कार्यक्रमके सात सोम्मार सम्पन्न हुइल बा ।
कैलाली बहुमुखी क्याम्पसके पूर्व क्याम्पस प्रमुख सुरेन्द्र चन्दके वरका पहुनामे हुइल कार्यक्रममे उहाँ ग्यालेक्सी मावि सुदूरपश्चिम प्रदेशमे अब्बल विद्यालयके रुपमे स्थापित हुइटी गैल बटैलै । विद्यालय विद्यार्थीहुकनहे पढैना संस्था केल नइहो, पढाईसंगे अतिरिक्त क्रियाकलापमे ओटरे ध्यान डेहे परठ,’ उहाँ कहलै, ‘जौन ग्यालेक्सी माविमे बा । अतिरिक्त क्रियाकलापमे आघे । कलेसे गैल वर्षके एसईईके परिक्षामे प्रदेशमे पहिल हुके अब्बल सावित करले बा ।’

ग्यालेक्सी माविके निटु विष्ट ४ जिपिए नानके सुदूरपश्चिम प्रदेशमे पहिल स्थान हासिल करल रहिट । उहाँहे ग्यालेक्सी माविसे ३०औं वार्षिकोत्सव तथा अभिभावक दिवसके अवसरमे नगदसहित दोसल्ला ओह्रके सम्मान करले बा । ओस्टेक करके उहाँ डाडा निखिल विष्टफे प्लस टु मे अपन विद्यालयमे सबसे ढेर अंक ल्यानल ओरसे विद्यालयसे नगदसहित सम्मान करले बा ।

कार्यक्रममे विशिष्ट पहुना ग्यालेक्सी माविके विद्यालय व्यवस्थापन समिति सदस्य तथा पूर्व सांसद महेश्वर पाठक वार्षिकोत्सवके अवसरमे यी विद्यालयके विद्यार्थीनसे डेखाइल प्रतिभासे खुशी बनाइल बटैलै । उहाँ कहलै, मै फे नम्मा समयसम अध्यापन पेशामे विटैन ।
विद्यार्थीके भविष्य बनैना शिक्षकके हातमे रहठ,’ उहाँ कहलै, ‘यी विद्यालयके शिक्षक÷शिक्षिकासे करल मेहनत आज विद्यार्थी सफल हुइल बटै । शिक्षकसँगे अभिभावकसे अपन लर्कनके ध्यान डेहे पर्ना जरुरी बा ।’
देशमे हुइटी रहल भष्ट्राचार, अनियमितता, फोहोरी राजनिति डेखके वक्कादिक्का लागठ । विद्यालयके वार्षिकोत्सवमे सहभागिता हुईबेर विद्यार्थीके प्रतिभा देखके फेर आश पलाइठ, उहाँ कहलै ।

नाष्ट कलेजके प्रमुख शिवहरि मुडभरी शर्मा ग्यालेक्सी माविके सक्षम व्यवस्थापनसे विद्यालय प्रगतिओर लम्कटी गैल बटैलै । बालबालिकाके पहिल विद्यालय अपन घर, पहिल शिक्षक ओकर डाईबाबा हो,’ उहाँ कहलै, ‘छोट लर्कनहे मोवाइलके कुलतसे बचाई परठ । हम्रे खाना पकैना बेला, काम कैना बेला, सुताईबेर छोट बालबालिकनहे मोवाइल डेहे भुलैना वा अपन काममे व्यस्त हुइठी । उहीसे बालबालिकामे पारल असर हम्रे ध्यान नइडेठी ।’ मोवाइलके कारण बालबालिकाके दिमागमे पारल असरसे बालबालिका रिसहा, एकोहोर हुइटी गैल बटैलै ।
उहाँ कहलै, ‘हम्रे मोवाइल चलाई नइडेना कहल नइहो मने उ ओकर प्रयोग दुरुपयोग का करटी रहल बा । अभिभावकसे ध्यान डेहे परठ ।’ शिक्षक कहल विद्यार्थीके दुसरा अभिभावक हो मायासे पह्रलेसे विद्यार्थीके हौसला बह्रठ, उहाँ कहलै ।
ग्यालेक्सी माविके विद्यालय व्यवस्थापन समिति अध्यक्ष मोहनराज जोशीके अध्यक्षतामे हुइल कार्यक्रममे विद्यालयके प्रिन्सिपल छत्रराज पण्डित विद्यालयके प्रगति तथा संचालन हुइल गतिविधिबारे जानकारी डेहल रहिट ।

ग्यालेक्सी माविके ३०औं वार्षिकोत्सव तथा अभिभावक दिवसके अवसरमे विद्यालयसे शिक्षक अमिन सत्गौवा, शिक्षिका दिपा भट्ट ओ विद्यालयके सवारी चालक राजाराम चौधरीहे नगद आ दोसल्लासहित सम्मान करले बा । ओस्टे अपन विद्यालयमे अध्ययन करके मजा अंक नानके पास हुइल विद्यार्थी शसान्त मडै, दिप उपाध्याय, निशान्त उपाध्यायहेफे दोसल्ला ओ नगदसहित सम्मान करले बा ।

विद्यालयसे ३०औं वार्षिकोत्सव तथा अभिभाव दिवसके अवसरमे शैक्षिक तथा टमान खेलकुद प्रतियोगितामे भाग लेहल विद्यार्थीहुकनहेफे प्रमाणपत्र ओ ट्रफीसहितके पुरस्कार वितरण करल रहे । उ पुरस्कार पहुनाके रुपमे सहभागी टमान विद्यालयके प्रधानाध्पाकहुक्रे वितरण करल रहिट । ओस्टेक करके विद्यार्थीहुक्रे टमान मेरिक प्रस्तुती डेखैले रहिट ।
