एक्सिस विद्याश्रमके १९औं वार्षिकोत्सव
पहुरा समाचारदाता
धनगढी, ७ फागुन । धनगढी उपमहानगरपालिका वडा नम्बर ५ स्थित एक्सिस विद्याश्रम सेकेण्डरी स्कूलके १९औं बार्षिकोत्सव सोम्मारके रोज सम्पन्न हुइल बा ।
विद्यालयके प्राचार्य अनिता पन्तके घरगोसियाइमे हुइल कार्यक्रमके बर्का पहुना राष्ट्रिय परीक्षा बोर्ड सुदूरपश्चिम प्रदेश प्रमुख धनपति भेटुवाल रहल रहिट । बर्का पहुना भेटुवाल कार्यक्रमहे सम्बोधन कैटी एक्सिस विद्याश्रमविद्यार्थीनहे किताबी ज्ञानसँगे व्यवहारिक ज्ञान डेना अग्रसर रहल बटाइल रहिट ।
उहाँ छोट समयमे ढेर सफलता पाइल कहटी विद्यालयप्रति अभिभावके विश्वास नै विद्यालयके सफलता रहल बटाइल रहिट ।
नाष्ट कलेजके प्राचार्य शिवहरी मुडभरी एक्सिस विद्याश्रम गुणस्तरीय शिक्षा डेनाके सँगे विद्यार्थीहे अतिरिक्त क्रियाकलाप कैनामे जोड डेहल बटाइल रहिट ।
धनगढीके पूर्व मेयर खेमराज पाण्डे एक्सिस विद्याश्रम प्रिप्राइमेरीसे लेके प्लसटु सम विद्यार्थी तथा अभिभावकके रोजाइमे पर्ना सफल हुइल बटाइल रहिट ।
कार्यक्रममे प्राचार्य पन्तविद्यार्थीनहे सफल बनाइक लाग विद्यालयके टिचर किल नैहोके अभिभावक फेन जिम्मेवार बने पर्ना बटाइल रही । उहाँ कहली,‘एकठो विद्यार्थीहे सफल बनाइक लागपह्रैना लिखैनामे विद्यालयके शिक्षक शिक्षिका जत्रा केयर करे परठ्, ओत्रहे केयर ओकर अभिभावक, घर परिवार फेन करे पर्ना जरुरी रहठ् ।’
प्राचार्य पन्त विद्यालयमे विद्यार्थीनहे किताबी ज्ञानसँगे व्यवहारिक ज्ञान फेन डेना ओर अग्रसर रहल बटाइल रही ।
उहाँ कहली, हम्रे किताबी ज्ञानसँगे विद्यार्थीनहे व्यवहारिक ज्ञान डेना ओर ध्यान डेले बाटी । समाज घरपरिवारमे घटल घटना अथवा कौनो फेन विषय बस्तुबारे विद्यार्थीहुक्रे अनभिज्ञ रहे सेक्ठै । उ बारे हम्रे विद्यार्थीनहे जानकारी करैनाके साथेविद्यार्थीनहे रहल प्रतिभासे लेके विद्यार्थीनके सीपहे फेन प्राथमिकतामे रख्ले बाटी ।’
उहे बिच वार्षिकोत्सवके अवसरमे आयोजित टमान मेरिक प्रतियोगिता तथा कक्षामे उत्कृष्ट हुइल विद्यार्थीनहे प्रमाणपत्र वितरण करल रहे । कार्यक्रममे टमान मेरिक सांस्कृतिक प्रस्तुती फेन प्रस्तुत करगिल रहे ।
