कैलारीमे चालु आवमे ७६ जाने पैलै रोजगारी

पहुरा समाचारदाता
हसुलिया, २३ फागुन । कैलालीके कैलारी गाँउपालिका हसुलियामे चालु आर्थिक वर्षमे ७६ जाने रोजगारी पैले बटै । प्रधानमन्त्री स्वरोजगार कार्यक्रम अन्तरगत ओइने रोजगार पाइल हुइट ।
सूचिकृत फर्म भरल १ हजार ६ सय ४३ जाने मध्ये ७६ जाने छनौटमे परल कैलारी गाँउपालिकाके रोजगार सहायक ईन्द्रश्याम चौधरी जानकारी डेलै । बजेटअनुसार छनौट कैना ओ ढेर बजेट बा कलेसे ढेर व्यक्ति छनौट कैना करल उहाँ बटैलै । गैल वर्षके तुलनामे चालु आवमे कम बजेटके कारण कम व्यक्ति छनौटमे परल उहाँक कहाई बा । चालु आवमे जम्मा बजेट ५२ लाख ८९ हजार रहल उहाँ बटैलै ।

‘रोजगार पाइल व्यक्तीसे ज्यालदारीमे काम करे पर्ना रहठ,’ चौधरी कहलै ‘विकास निर्माण सम्बन्धीके काम जस्ते सडक मर्मत खानेपानी टंकी, पाइप लाइन विस्तार करेबेर नाली कोर्ना पटानी, मन्दिर बगैचा निर्माणके काममे ज्यालादारी करे पर्ना रहठ ।’
दैनिक ज्यालादारी रु. ६ सय ६८ रहल उहाँ बटैलै । गैल वर्ष ज्यालादारी ५ सय ७७ रहल रहे । कलेसे यी बर्ष ९१ रुपैया बढके ६ सय ६८ रुप्या रहल उहाँ बटैलै ।

प्राविधिक सीप विकासके लाग २७ जाने छनौट
कैलारी गाउँपालिकामे प्राविधिक सीप विकासके लाग २७ जाने छनौट हुइल बटै । गाउँपालिकाके उद्यमशील विकास शाखा अन्तरगत चालु आवमे ३० जाने आवेदन डेहल मध्ये २७ जाने छनौटमे परल हुइट ।
१० जानेक लाग खाजा नास्ता सम्बन्धीके ७ दिने तालिम डेहल बा कलेसे ३ जानेक लाग वेमौसमी टिना खेती सम्बन्धी ३ दिने तालिम डेहल कैलारी गाउँपालिका उद्यमविकास सहजकर्ता निर्मला चौधरी जानकारी डेली ।
ओस्टेक करके ३ जानेक लाग मोटरसाइकिल रिपेयरिङ ४५ दिने तालिम ओ बाँकी ११ जनहनहे सिलाइकटाई आधारभूत तालिम डेहल उहाँ बटैली ।

चालु आवमे संघीय सरकारसे १२ लाख बजेट बिनियोजन हुइल उहाँ बटैली । अटरसे पैसासे नइपुगठ मने पुग्न जटरा काम हुइटी रहल उहाँ बटैली । स्तरोन्नतिके लाग २ लाख, ५ जाने हुइल उद्यमी समूहहे प्रविधि हस्तान्तरणके लाग १ लाख ४० हजार तथा ८ लाख ६० हजार नयाँ उद्यमी सिर्जनाके लाग बजेट आइल उहाँक कहाई बा ।
८ लाख ६० हजारके बजेटसे प्रतिशतके हिसावमे २ जाने सहजकर्ताके लाग ३ महिनाके तलब केल २ लाख ८३ हजार आठ सय रुप्या हुई आइठ उहाँ कहली बाँकी बचल बजेटसे सीप विकासमे खर्चना करजाइठ ।
