विश्वासके मतपाछे काम हुईः मन्त्री भण्डारी
पहुरा समाचारदाता
धनगढी, ३० फागुन । उद्योग, वाणिज्य तथा आपूर्ति मन्त्री दामोदर भण्डारी विश्वासके मत पासेकलपाछे सरकार अपन काम प्राथमिकतासाथ आघे बह्रैना बटैले बटै ।
मंगरके रोज धनगढीमे प्रेस चौतारी नेपालसे आयोजना करल पत्रकार सम्मेलनमे उहाँ वर्तमान अवस्थामे डेखा परटी रहल संकटहे सुधार कैना करके सरकारसे काम आघे बह्रैना बटाइल हुइट । उहाँ कहलैे,“मुलुकके आर्थिक अवस्था सङ्कुचनमे बा । राजस्व संकलन न्यून रहल बा । वर्तमान सत्तागठबन्धनसे यम्ने सुधारके कार्य करी ।”
मुलुकमे असान्दर्भिक गठबन्धन भटक्के अग्रगामीहुकनबिचके नयाँ सत्ता गठबन्धन बनल मन्त्रीके कहाई रहे । उहाँ टमान प्रभावकारी मुद्दा अघिल्का सरकारसे आघे बह्राई नइसेकल जिकिर करलै । ओस्टेक पत्रकारके एक प्रश्नके जवाफमे उहाँ निर्णायक रहल नागरिक उन्मुक्ति पार्टीफे वर्तमान गठबन्धनमे अइना विश्वास व्यक्त करलै ।
“मने, गठबन्धनमे अइना कि प्रतिपक्षमे बैठना कना बाट उहाँहुकनके नीजि विषय हो”, मन्त्री कहलै,“नागरिक उन्मुक्तिसे अभिासम स्पष्ट नीति नइरख्लेसेफे जहाँसम सत्ता गठबन्धनमे अइना हम्रे विश्वास करले बटी ।”
ओस्टेक करके, मुलुकमे लगानीके वातावरण बनैनामे सरकारके तत्परता रहना मन्त्री भण्डारीके कहाई रहे । उहाँ उद्योगमैत्री वातावरण बनैना कार्यमे अपन विशेष प्राथमिकता रहना बटैलै । मन्त्री भण्डारी अभिनसम मुलुकमे लगानीके वातावरण बने नइसेक्ना कारण सरकारसे आयोजना करे जैटी रहल लगानी सम्मेलनमे खोज्ना उल्लेख करलै ।
“लगानी सम्मेलन आइटसम लगानीके लाग संसद्सेफे महत्वपूर्ण कार्य हुई”, उहाँ कहलै,“खानीके बाटमे अन्तरसम्बन्ध बाझल बा । स्थानीय तह ओ संघीय सरकारके कार्य क्षेत्र बाँझल बा । ओसिन विषयहे समायोजन करके लगानीके सुनिश्चितता कैबी ।”
अपने दुसरा चो उद्योग, वाणिज्य तथा आपूर्ति मन्त्रालयके जिम्मेवारी पाइल ओरसे सुदूरपश्चिमके उद्योग ओ खानीसंग सम्बन्धित विषयहे प्राथमिकताके साथ आघे बहै्रना मन्त्रीके कहाई रहे । उहाँ दोधारा चाँदनी सुख्खा बन्दरगाह, दैजी छेला औद्योगिक क्षेत्र, हरैया विशेष आर्थिक क्षेत्रके बाट अभिनसम जहाँके टहे रहल कहटी आब अपने विशेष ध्यान डेना उल्लेख करलै ।
सुदूरपश्चिममे रहल भारी आयोजनाहे आघे बह्रैना बाट सरकारके इच्छाशक्तिमे भर पर्ना करल स्पष्ट परटी मन्त्री भण्डारी आवश्यकता ओ सान्दर्भिकताके आधारमे यहाँके योजनाहे सरकारसे प्राथमिकता डेहे पर्ना जिकिर करलै ।
