पाँचुवा राष्ट्रिय कठरिया साँस्कृतिक होरी महोत्सव
पहुरा समाचारदाता
धनगढी, १० चैत । कठरिया थारु समुदायसे शनिच्चरके रोज कैलाली जिल्लाके घोडाघोडी नगरपालिका–११ तप्पा गाउँमे पाँचुवा राष्ट्रिय कठरिया साँस्कृतिक होरी महोत्सव २०८० मनैले बटै ।
कठरिया समाज नेपालके केन्द्रीय अध्यक्ष दुखिराम कठरियाथारुके अध्यक्षतामे हुइल कार्यक्रमके बरका पहुना सुदूरपश्चिम प्रदेश सरकारके मुख्यमन्त्री कमलबहादुर शाह ओ विशिष्ट पहुना सुदूरपश्चिम प्रदेश सरकारके विना विभागिय मन्त्री माननीय खुशीराम चौधरी रहल रहिट ।
कठरियाथारु समुदायके कला, संस्कृति लोप हु्इटी गैलक ओरसे उहीहे संरक्षण करेक लाग कठरिया साँस्कृतिक होरी महोत्सवके आयोजना हुइल कैलारी गाउँपालिका वडा नम्बर ८ के वडा अध्यक्ष तारामल कठरिया बटैलै ।
होरी महोत्सवमे कठरियाथारु समुदायके टमान गाउँक मेरमेराइल होरी नाँच डेखाइल बा । कैलालीके कैलारी जोशीपुर, जानकी, बर्दगोरिया गाउँपालिका, भजनी, घोडाघोडी, टीकापुर, गौरीगंगा, लम्कीचुहा नगरपालिकाके टमान ठाउँमे कठरियाथारु समुदायक बसोबास रहल बा । कलेसे दुई स्थानीय पालिकाके उपप्रमुखमे कठरियाथारु समुदायसे प्रतिनिधित्व करले बटै ।
