सुदूरपश्चिममे दुई मन्त्रीनसे पदभार ग्रहण
जनताके म्याण्डेड अनुसार काम कैना
पहुरा समाचारदाता
धनगढी, १५ चैत । सुदूरपश्चिम प्रदेश सरकारमे विफेक रोज दुई मन्त्रीसे पदभार ग्रहण कैले बटै ।
सामाजिक विकास मन्त्रीमे लक्ष्मणकिशोर चौधरी ओ उद्योग पर्यटन वन तथा वातावरण मन्त्रीमे खुशीराम चौधरी पदभार ग्रहण करल हुइट । पदभार ग्रहण करटी सामाजिक विकास मन्त्री लक्ष्मणकिशोर चौधरी जनताके म्यान्डेड अनुसार अपनेहुक्रे मन्त्री बनल ओ जनताके चाहना अनुसार काम कैना बटैलै ।
उहाँ कहलै, ‘हमार पार्टी अब्बे कुछ तरङ ओ तरङित अवस्थामे बा उहीहे मै स्वीकारठु । पार्टीके समस्या एक ओर बा । मने जनताके जनजिविका ओ सरोकारके विषयवस्तुप्रति हम्रे गम्भीर हुई पर्ना जरुरी बा ।’
सुदूरपश्चिम प्रदेश सरकारहे पूर्णता डेना हमार लक्ष्य अनुसार हम्रे आघे बह्रल बटी । सुदूरपश्चिम प्रदेश सरकारमे नम्मा समयसम नेतृत्व विहिन हुई नइपरल मन्त्री चौधरी कहलै ।
अब्बेक सरकार धराप अवस्थामे रहल, नेपाली काँग्रेस नेतृत्वके सरकारहे सर्मथन कैनाकी नइकैना संचारकर्मीनसे पुछल पुछल प्रश्नके जवाफमे उहाँ पार्टीके केन्द्रीय सदस्यके नाताले पार्टीके बैठकमे सहभागी हुइल मने अपन पार्टी एक बरस पहिले नेपाली काँग्रेससे सहकार्य कैके आघे बह्रल ओ समर्थन जारी रना बटैलै । उहाँ कहलै, ‘पार्टीके निर्णय एक ठाउँमे हुई संघीय सरकार होए वा प्रदेश सरकार होए सेलेक्टेड जनप्रतिनिधिसे चलैना हो ।
सुदूरपश्चिम प्रदेश चलाउ कहिके जनता हम्रहिनहे म्याण्डेड डेसेकल बटै,’ मन्त्री कहलै, ‘यी बेला हम्रे जनतासे डेहल म्याण्डेडके पालना केल करटी रहल बटी । उ अनुसार जाई नइसेक्लेसे हमार कुछ काम नइरही । पार्टी टे सल्लाह सुझाव केल डेहे सेकठ ।’
मन्त्री हुसेकलपाछे यहाँके गतिविधिहे अध्ययन करटी जनतासे करल आशा अनुसार आघे बह्रना उहाँ बटैलै ।
ओस्टेक करके उद्योग पर्यटन वन तथा वातावरण मन्त्रीमे खुशीराम चौधरी पदभार ग्रहणपाछे देशके अर्थतन्त्र बल्गर बनैना ओर लग्ना बटैलै । मन्त्रालयके गतिविधि कर्मचारीके राय सल्लाहसुझाव अनुसार आघे बह्रैना उहाँ बटैलै । उहाँ कहलै, ‘कतिपय ठाउँमे ढलपडा रुखुवाके नाउँमे वन विनास हुइल बा । आब कदपि नइहुइना मने सडक किनारमे रहल सुखल रुखुवाके कारण टमान मेरिक दुर्घटना बह्रैटी रहल ओरसे उहीहे हटैना उहाँ बटैलै । मन्त्री कहलै, ‘मोर छोटेसे आदात बा, कोइ खराब कटरा कलेसे उहीहे संरक्षण नइकैना । अब्बे मन्त्रालयके कार्यभार सम्हारपाछे उ जिम्मेवारी मोर काँधमे ढपल बा । गलट कामके कबु समर्थन नइरही ।’
उहाँ नेपाली काँग्रेस नेतृत्वके सरकारहे अपन सदैव समर्थन रना बटैलै । सामाजिक विकास मन्त्रालयमे सपथ ग्रहण कार्यक्रममे आर्थिक मामिला मन्त्री घनश्याम चौधरी ओ भुमि व्यवस्था तथा कृषि सहकारी मन्त्री रामेश्वर चौधरी, राज्यमन्त्री इन्दिरा गिरी भेटके सफलताके शुभकामना डेहल रहिट । कलेसे उद्योग पर्यटन वन तथा वातावरण मन्त्री खुशीराम चौधरी पदभार ग्रहणपाछे उहाँहे सामाजिक विकास मन्त्री लक्ष्मण किशोर चौधरी, भुमि व्यवस्था तथा कृषि सहकारी मन्त्री रामेश्वर चौधरी ओ आर्थिक मामिला मन्त्री घनश्याम चौधरीफे भेटके सफलताके शुभकामना डेहल रहिट ।
