मैत्रीपूर्ण फुटसलमे प्रेस युनियन विजयी
पहुरा समाचारदाता
धनगढी, १६ चैत । नेपाल पत्रकार महासंघके ६९ औं स्थापना दिवसके अवसरमे शुकके रोज धनगढीमे मैत्रीपूर्ण फुटसल प्रतियोगिता तथा शुभकामना आदानप्रदान कार्यक्रम हुइल बा ।
महासंघ, कैलालीके आयोजनामे हुइल फुटसल प्रतियोगितामे नेपाल प्रेस युनियन कैलाली विजयी हुइल बा । एकतर्फी खेलमे प्रेस युनियन, कैलाली प्रेस चौतारी नेपाल, कैलालीहे ९–१ गोलअन्तरसे पराजित करल हो ।
खेलके पहिल हाफमे प्रेस युनियन कैलाली टीम २–० के अग्रता लेहलमे डुसरा हाफमे आउर आक्रामक खेल प्रदर्शन कैटी ७ गोल थपल रहे । फाइनल खेलमे युनियनके गगन अयडी ह्याट्रिक (३ गोल) करल रहिट । उहाँ खेलके सुरुवातमे पहिल गोल कैटी टीमहे अग्रता डेहुवाइल रहिट ।
ओस्टके, युनियनके प्रदीप पाठक, योगेन्द्र नायक ओ राजेश चौधरी २/२ गोल करल रहिट । प्रेस चौतारीके ओरसे डुसरा हाफमे एकठो किल सान्वना गोल भानुभक्त आचार्य करल रहिट ।
प्रतियोगितामे नेपाल पत्रकार महासंघ, कैलाली, प्रेस युनियन, प्रेस चौतारी, प्रेस सेन्टर ओ समाजवादी प्रेस संगठन कैलालीके टीम सहभागी रहल रहे ।
महासंघके स्थापना दिवसके अवसरमे आयोजित शुभकामना आदानप्रदान कार्यक्रममे सहभागीहुक्रे शुभकामना मन्तव्य व्यक्त करल रहिट । उहे अवसरमे नेपाल पत्रकार महासंघके केन्द्रीय सचिव हेमकर्ण विक, केन्द्रीय सदस्य भरत शाह, महासंघके सुदूरपश्चिम प्रदेश अध्यक्ष योगेश रावल, नेपाल प्रेस युनियनके प्रदेश अध्यक्ष मनमोहन स्वार, प्रेस चौतारीके प्रदेश अध्यक्ष कृष्ण ओली ओ प्रेस सेन्टरके प्रदेश इन्चार्ज रामसिंह ठगुन्ना शुभकामना मन्तव्य व्यक्त करल रहिट ।
कार्यक्रम महासंघ कैलालीके अध्यक्ष हिमाल जोशीके अध्यक्षतामे हुइल रहे । महासंघके जिल्ला उपाध्यक्ष हरिश विकसे स्वागत करल कार्यक्रमके सञ्चालन सदस्य शंकर बोहरा करल रहिट ।
