स्वर्गिय वडा सदस्य माघुरामके परिवारहे १० लाखके विमा रकम हस्तान्तरण

पहुरा समाचारदाता
हसुलिया, २२ चैत । कैलारी गाउँपालिका–८ के वडा सदस्य माघुराम चौधरीके परिवारहे १० लाखके विमा रकम हस्तान्तरण कैगिल बा ।

कैलारी गाउँपालिकासे सक्कु जनप्रतिनिधिहुकनके विमा करल ओरसे अकालमे ज्यान गुमाइल स्वर्गिय वडा सदस्य माघुराम चौधरीके गोसिनीया गीतादेवी चौधरीहे सनिमा रिलाइन्स लाईफ इन्स्योरेन्स मार्फत एक कार्यक्रमके विच विमा रकमके चेक हस्तान्तरण कैगिल हो ।

वडा नम्बर ८ के वडा अध्यक्ष तारामल कठरियाके अध्यक्षतामे हुइल कार्यक्रमके बरका पहुना कैलारी गाउँपालिका अध्यक्ष राजसमझ चौधरी, विशिष्ट पहुना गाउँपालिकाके प्रमुख प्रशासकीय अधिकृत लक्ष्मीदत्त भट्ट ओ सनिमा रिलाइन्स लाईफ इन्स्योरेन्सके प्रदेश प्रमुख गणेश प्रसाद उप्रेती उ चेक हस्तान्तरण करल रहिट ।

कार्यक्रममे गाउँपालिका अध्यक्ष राजसमझ चौधरी कैलारी गाउँपालिकासे अब्बेसम दुई जाने सदस्य गुमाइल मने जनप्रतिनिधिहु्कनके विमा करैना प्रक्रियासे पहिले एक जाने जनप्रतिनिधि ओराइल ओरसे हुकहिनहे यी विमामे समावेश कराई नइसेक्गिल बटैलै ।

उहे अवसरमे उहाँ गाउँपालिकाहे केन्द्रसे अइना बजेटमे कटौटी हुइल कारण अब्बे सम्झौता हुइल योजनाके कामफे कैना गाह्रो हुइल बटैलै । कार्यक्रममे वडा सदस्य लक्ष्मी चौधरी, थाकसके केन्द्रीय सदस्य रामचरण चौधरी, सनिमा रिलाइन्स लाईफ इन्स्योरेन्सके कर्मचारीहुकनके सहभागिता रहे । कार्यक्रम संचालन लौटन कठरिया करल रहिट ।