अनलाइनसे नागरिकताके लाग सिफारिस

पहुरा समाचारदाता
धनगढी, २६ चैत । कैलालीके धनगढी उपमहानगरपालिकासे अनलाइनसे नागरिकताके फारम सिफासि कैना व्यवस्था करल बा ।

धनगढी उपमहानगरपालिका–२ के दीर्घराज जोशीके छाइ प्रसंशा जोशीके नागरिकताके सिफारिस फारम कम्प्युटर सिस्टमसे सिफारिस करल हो ।

धनगढी उपमहानगरपालिकाके नगर उपप्रमुख कन्दकलाकुमारी राना ओ प्रमुख जिल्ला अधिकारी धर्मेन्द्रकुमार मिश्र प्रसंशा जोशीके नागरिकताके सिफारिस कम्प्युटर सिस्टमसे सिफारिस कैके उक्त फारम हस्तान्तरण करल रहिट । अनलाइनसे नागरिकताके लाग सिफारिस कैना व्यवस्था सुदूरपश्चिम प्रदेशमे पहिल रहल जिल्ला प्रशासन कार्यालय कैलाली जनैले बा ।

उहे बिच धनगढी उप–महानगरपालिका ओ जिल्ला प्रशासन कार्यालयसे केन्द्रिय सूचना प्रणालीको एक्सटर्नल मोड्युल प्रयोग कैके कम्प्युटर सिस्टमसे नागरिकता सिफारिस कैना सम्बन्धी उप–महानगरपालिकाके १९ वडाके वडा अध्यक्ष, वडा सचिव, कम्पुटर अपरेटरहे अभिमुखिकरण कार्यक्रम फेन डेगैल बा ।