पूर्व तयारीसे विपद जोखिम न्यूनिकरण करेसेक्जाइठः गाउँपालिका उपाध्यक्ष
पहुरा समाचरदाता
हसुलिया, २८ चैत । विपद जोखिम न्यूनिकरण ओ व्यवस्थापनमे स्थानीय तहके क्षमता अभिवृद्धि लाग दिने तालिम बुधके रोजसे हसुलियामे सुरु बा ।
कैलारी गाउँपालिकाके उपाध्यक्ष भगवतीकुमारी चौधरीके अध्यक्षतामे हुइल उदघाटन कार्यक्रममे उहाँ पूर्व तयारीसे पूर्व तयारीसे विपदके जोखिम न्यूनिकरण करेसेक्जैना बटैली । खास कैके प्राकृतिक विपद ओ मानव सृजित विपदसे अब्बे ढेर धनजनके क्षति हुइटी बा,’ गाउँपालिका उपाध्यक्ष कहली, ‘विपद धनी गरिब कुहीहे नइचिन्ह सक्कु जनहनहे असर पारे सेकठ । ओकर पूर्व तयारीसे पूर्णसे क्षतिहे रोके नइसेक्लेसे न्यूनिकरण करे सेक्जाइठ ।’ पहिले पुर्खाहुक्रे विपद बाँचेक टमान मेरिक प्रविधि अपनाइठ । अब्बे विकासके नाउँमे वातावरणमे असर पर्ना मेरिक गतिविधि संचालन करलपाछे बाढी पहिरोके समस्या बह्रल उहाँ बटैली ।
कैलारी गाउँपालिका विपदके अति उच्च जोखिममे रहल ओरसे यहाँके बासी बाढी डुबान, कटान, पटानके साथे आगीसे पीडित हुइल उपाध्यक्ष बटैली । कैलारी गाउँपालिकाके टमान वडामे मोहना, घुरहा,कटैनी लडियासे कटान डुबान करटी आइलफे बटैली । तीन दिने तालिमसे जनप्रतिनिधि तथा विषयगत शाखाके पदाधिकारीहुकनके क्षमता विकासमे टेवा पुग्ना उहाँ बटैली । उहाँ तालिममे सक्रिय सहभागिताके लागफे आग्रह करल रही ।
कैलारी गाँउपालिकाके आयोजना तथा नेपाल रेडक्रस सोसाइटी,विपद् जोखिम व्यवस्थापनमा सवलताका लागि सहकार्य परियोजनाके प्राविधिक सहयोगमे तालिमके सुरुवात हुइल बा ।
कैलारी गाउँपालिकामे सन् २०२२ जुलाईसे सुरु हुइल परियोजना अगस्ट २०२४ सम सञ्चालन रहल बा । स्थानीय तहके विपद् जोखिम व्यवस्थापनमे क्षमता अभिवृद्धि कैना उद्देश्यसे तालिमके आयोजना करल परियोजना अधिकृत मुकेश चन्द्र गौतम बटैलै । परियोजनासे विपद् जोखिम न्यूनीकरण ओ व्यवस्थापनमे आवश्यक सहजीकरण कैना,नीति निर्माण योजनामे सहयोग, स्थानीय आपतकालिन कार्य सञ्चालन केन्द्र स्थापना तथा सञ्चालनमे सहजीकरण करटी उहाँ बटैलै । कार्यक्रममे स्थानीय विपद व्यबस्थापन समितिके पदाधिकारी, सुरक्षा निकाय , नेपाल रेडक्रस कैलारी उपशाखा, विषयगत शाखा प्रमुख तथा प्रतिनिधि लगायतके सहभागिता रहल बा ।
तालिममे सहजीकरण तथा प्रशिक्षण नेपाल रेडक्रस सोसाइटी कैलालीके स्ट्रोन इन डिआरएम परियोजना अधिकृत मुकेश चन्द्र गौतम, नेपाल रेडक्रस सोसाइटी कैलाली धनसिहंपुर उपशाखा सभापति रतन टमट्टा, स्ट्रोन इन डिआरएम परियोजनाके पालिका सहायक प्रकाश डाँगी, तपेन्द्र तिमिल्सिनासे कैजैटी रहल बा ।
तालिम चैत ३० गतेसम संचालन हुइना बा ।
