धनगढीमे सामुदायिक विद्यालयके नतिजा सुधार

कक्षा ८ के परीक्षाके नतिजा ९ से बह्रके ३१ प्रतिशत पुगल

पहुरा समाचारदाता
धनगढी, २९ चैत । धनगढी उपममहानगरपालिकामे कक्षा ८ के परीक्षाके नतिजा ९ प्रतिशतसे बह्रके ३१ प्रतिशत पुगल बा । सामुदायिक विद्यालयहुकनके आधारभूत तहके परीक्षा नतिजामे गैल वर्षसे यी वर्ष सुधार हुइल हो ।

गैल वर्ष परीक्षामे सहभागी हुइल मध्ये पहिल चरणमे ९ दशमलव ४७ प्रतिशत विद्यार्थी केल उत्तीर्ण हुूइल रहिट । यी वर्ष भर सामुदायिक विद्यालयसे पहिल चरणमे ३१ प्रतिशत विद्यार्थी सफल हुइल बटै । गैल वर्ष १७ ठो सामुदायिक विद्यालयके नतिजा शून्य आइलमे यी वर्ष कौनोफे सामुदायिक विद्यालयके नतिजा शून्य नइहो । शैक्षिक सत्र २०८१ मे सामुदायिक विद्यालयके नतिजा सन्तोषजनक आइल उपमहानगरपालिकाके शिक्षा, युवा तथा खेलकुद महाशाखा प्रमुख नरेन्द्रबहादुर खाती बटैलै । ‘यी वर्ष गैल वर्षके तुलनामे कक्षा ८ के परीक्षाके नतिजामे सुधार डेखल बा । यी वर्षके नतिजाहे सन्तोषजनक कहे मिल्ठ’ खाती कहलै ।

यी वर्ष धनगढीके ४२ ठो सामुदायिक विद्यालयके ३ हजार ५२४ विद्यार्थी कक्षा ८ के वार्षिक परीक्षामे सम्मिलित हुइल रहिट । परीक्षामे सम्मिलित हुइल मध्ये एक हजार ९० जाने विद्यार्थी आधारभूत तहके पहिल चरणके परीक्षामे सफल हुइल बटै । “गैल वर्ष ९ दशमलव ४७ प्रतिशत विद्यार्थी केल पहिल चरणमे सफल हुइलमे यी वर्ष ३१ प्रतिशत विद्यार्थीसे कक्षा ९ मे भर्ना हुइना आवश्यक ग्रेड हासिल करले बटै । गैल वर्षसे परीक्षा सञ्चालन, परीक्षण तथा नतिजा प्रकाशन व्यवस्थित हुइल ओरसे यी वर्ष नतिजामेफे सुधार हुइल बा ।, “शिक्षामे महाशाखा प्रमुख खाती कहलै ।

धनगढीके सामुदायिक विद्यालयमे अधिकतम ६५ दशमलव ७८ ओ न्यूनतम ७ दशमलव ५२ प्रतिशत विद्यार्थी उत्तीर्ण हुइल बटै । धनगढी–१६ के बेहडाबाबा माध्यमिक विद्यालयके सर्वाधिक ६५ दशमलव ७८ प्रतिशत विद्यार्थी पास हुइल बटै । बेहडाबाबा माध्यमिक विद्यालयक ७६ मध्ये ५० जाने विद्यार्थी पहिल चरणमे उत्तीर्ण हुइल हुइट ।

धनगढी–३ के त्रिभुवन माध्यमिक विद्यालयके ६० प्रतिशत नतिजा आइल बा । कलेसे सिद्धनाथ माध्यमिक विद्यालय जुगेडाके ५८ दशमलव ९७ प्रतिशत विद्यार्थी उत्तीर्ण हुइल बटै । ओस्टेक करके, राष्ट्रिय माध्यमिक विद्यालय उर्मासे ५५ दशमलव ५५ प्रतिशत विद्यार्थी उत्तीर्ण हुइल बटै । यी वर्ष शिक्षक, अभिभावक ओ विद्यार्थीसे समेत मेहनत करेबेर नतिजामे सुधार ह्ुइल ठम्याइ शिक्षा महाशाखा प्रमुख खातीके बा । “गैल वर्ष शून्य नतिजा हासिल करल विद्यालयके परीक्षा नतिजा बह्ुट मजा आइल बा,’ उहाँ कहलै, “दिवा छात्रावास तथा अतिरिक्त कक्षा समेत चलाके वर्षभरर पठनपाठन करल ओरसे गैल वर्ष कमजोर डेखल विद्यालयमे व्यापक सुधार हुइल बा ।’

गैल वर्ष शून्य नतिजा हासिल करल धनगढी–१२ जुगेडाके दुर्गा आधारभूत विद्यालयके यी वर्ष उत्तीर्ण प्रतिशत बह्रके ५१ दशमलव ४२ प्रतिशत पुगल बा । ओस्टेक, शून्य नतिजा आइल धनगढी–१० जुगेडाके जनकल्याण माध्यमिक विद्यालयके ४८ दशमलव ८७ ओ धनगढी–१३ श्रीलंकाके नवज्योति आधारभूत विद्यालयके ४७ दशमलव ४३ प्रतिशत विद्यार्थी उत्तीर्ण हुइल बटै । सामुदायिक ओ संस्थागत विद्यालयसे आधारभूत तहके परीक्षामे सम्मिलित हुइल ५ हजार ९३६ विद्यार्थी मध्ये ३ हजार ६१ जाने विद्यार्थी पहिल चरणमे पास हुइल बटै । जौन कुल परीक्षामे सम्ीिलित संख्याके ५२ प्रतिशत हो । गैल वर्षसे धनगढीमे आधारभूत तहके परीक्षा सञ्चालन, उत्तरपुस्तिका परीक्षण ओ नतिजा प्रकाशन व्यवस्थित करे लागल हो । यी वर्ष उपमहानगरपालिकासे नियमित विद्यालयके अनुगमन करल, विद्यालय, शिक्षक, अभिभावक ओ विद्यार्थीसे समेत मेहनत करल ओरसे नतिजामे सुधार आइल कहाई शिक्षा महाशाखा प्रमुख खातीके बा । “परीक्षा नतिजा सुधार हुइनामे सक्कु पक्षके योगदान रहल बा । अभिभावकसे पह्रना प्रेरित करल, शिक्षकहुक्रे बहुट मेहनत करल तथा उपमहानगरपालिकासे समेत अनुगमन ओ निरीक्षण करल ओरसे नतिजामे सुधार आइल हो,’ उहाँ कहलै, “सक्कु पक्षके कारण यी वर्ष नतिजामे सुधार आइल बा ।’

धनगढी उपमहानगरपालिकासे सामुदायिक विद्यालयके सिकाइ उपलब्धीमे सुधार नन्ना नगर प्रमुख शैक्षिक सुधार कार्यक्रम समेत लागु करले बा । यी वर्ष सामुदायिक विद्यालयसे दिवा छात्रावास ओ अतिरिक्त कक्षा सञ्चालनग करलसमेत सामुदायिक विद्यालयसे पठनपाठन कराइल ओरसे आधारभूत तहके नतिजामे सुधार आइल उपमहानगरपालिका जनैले बा ।