नतिजा सुधार करल विद्यालयहे धनगढी उपमहानगरसे सम्मान

पहुरा समाचारदाता
धनगढी, ३ चैत । धनगढी उपमहानगरपालिकासे शैक्षिक सत्र २०८० ममे लेहल आधारभूत तह कक्षा ८ के वार्षिक परीक्षामे नतिजा सुधार कैना १४ विद्यालयहे सम्मान कैगिल बा ।

शैक्षिक सत्र २०७९ मे शून्य नतिजा नानल मने शैक्षिक सत्र २०८० के वार्षिक परीक्षामे नतिजा सुधार कैना विद्यालयहे अँटवार एक समारोहमे सम्मान कैगिल हो । नगर उपप्रमुख कन्दकलाकुमारी राना नतिजा सुधार कैना विद्यालय रहल वडाके वडा अध्यक्ष, विद्यालय व्यवस्थापन समिति ओ प्रधानाध्यापकहुकनहे सम्मान करल हुइट ।

नगर उपप्रमुख रानासे फूलमाला, सम्मान पत्र ओ नगदसहित सम्मान करल हुइट । विद्यालयके नतिजा सुधार नन्ना मेहनत करल कहटी वडा अध्यक्ष, व्यवस्थापन समिति ओ प्रधानाध्यापकहुकनके हौसला बढैना सम्मान करल निमित्त प्रमुख प्रशासकीय अधिकृत नरेन्द्रबहादुर खाती बटैलै ।

गैल वर्ष १७ विद्यालयके कक्षा ८ के परीक्षामे शून्य नतिजा आइलमे यी वर्ष तीन विद्यालय समायोजन हुके बाँकी रहल १४ विद्यालयसे कक्षा ८ के परीक्षामे विद्यार्थी सहभागी हुइल रहिट । शून्यसे नतिजा सुधार करेबेर सबसे ढेर विद्यार्थी पास करैना तीन ठो विद्यालयहे नगद, प्रमाण पत्र ओ ट्रफीसहित सम्मान करल निमित्त प्रमुख प्रशासकीय अधिकृत खाती बटैलै ।

शून्यसे यी वर्ष सर्वाधिक ५१ दशमलव ४२ प्रतिशत विद्यार्थी उत्तीर्ण करैना सफल धनगढी–१२ दुर्गाबस्तीके दुर्गा आधारभूत विद्यालयहे नगद १५ हजार, प्रमाण पत्र ओ ट्रफी प्रदान करल बा कलेसे दुसरा ओ टिसरा ढेर प्रतिशत विद्यार्थी उत्तीर्ण करैना सफल धनगढी–१० के जनकल्याण माध्यमिक विद्यालय ओ धनगढी–१३ के नवज्योति आधारभूत विद्यालयहे क्रमशः १० हजार ओ ५ हजार नगदसहित प्रमाण पत्र ओ ट्रफी प्रदान करल बा ।

गैल वर्ष शून्य नतिजा नानल मने यी वर्ष नतिजामे सुधार नानल धनगढी–१ के सरस्वती आधारभूत विद्यालय,धनगढी–७ के शिव माध्यमिक विद्यालय, धनगढी–१३ के जनता राष्ट्रिय आधारभूत विद्यालय, धनगढी–१४ के शिवशंकर आधारभूत ओ सिद्धार्थ आधारभूत विद्यालयहे सम्मान करल हो । ओस्टे, धनगढी–१६ के दिपेन्द्रचारपाते माध्यमिक विद्यालय, वडा नम्बर १७ के भानु माध्यमिक विद्यालय ओ सज्जन आधारभूत विद्यालय, वडा नम्बर १८ के इन्दोदय ओ खप्तडी आधारभूत विद्यालय तथा वडा नम्बर –१९ के फूलबारी आधारभूत विद्यालयहे सम्मान करल बा ।

नतिजा सुधार कैना जनप्रतिनिधि, व्यवस्थापन समिति, प्रधानाध्यापक ओ शिक्षकहुक्रे करल मेहनतके कदर करटी सम्मान करल उपमहानगरपालिकासे जनाइल बा ।