एकीकृत प्रारम्भिक बालविकास शिक्षाके जग होः गाउँपालिका अध्यक्ष

पहुरा समाचारदाता
हसुलिया, १० बैशाख । स्थानीय तहमे एकीकृत प्रारम्भिक बालविकासके लाग योजना कार्यक्रम तथा अगामी योजना तर्जुमा कार्यशाला सोम्मारके रोजसे हसुलियामे सुरु बा ।

कैलारी गाउँपालिकाके आयोजनामे आयोजनामे युनिसेफ नेपालके आर्थिक सहयोग, सेतो गुराँस राष्टिय वालविकास सेवा केन्द्र तथा पीसविन कैलालीके प्राविधिक सहयोगमे योजना तर्जुमा कार्यशाला सुरु हुइल हो । गाउँपालिका अध्यक्ष राजसमझ चौधरीके अध्यक्षतामे हुइल कार्यक्रममे उहाँ प्रारम्भिक बालविकास कार्यक्रमसे बालवालिकाके सिकाइ तथा समग्र विकासके पक्षमे सकारात्मक प्रभाव परल बटैले बटै ।

शिक्षाहे गाउँपालिका पहिल प्राथमिकतामे धारके काम करटी रहल बा,’ गाउँपालिका अध्यक्ष कहलै, ‘प्रारम्भिक बालविकास कार्यक्रमसे बालवालिकाके सिकाइ तथा समग्र विकासके पक्षमे सकारात्मक प्रभाव परल बा । बालविकास केन्द्रके बसाइ व्यवस्थापन, सिकाइ क्षेत्र व्यवस्थापनमेफे सुधार हुइल ओरसे सक्कु जाने अपन क्षेत्रसे काम कैना आवश्यक बा ।’ पालिकाके अभिभाव समेट रहल गाउँपालिकासे सदैव सहकार्य ओ समन्वय कैना प्रतिवद्धता व्यक्तफे करले बटै ।

कार्यक्रममे कैलारी गाउँपालिकाके उपाध्यक्ष भगवतीकुमारी चौधरी सामुदयिक विद्यालयमे गुणस्तरीय शिक्षा प्रदान कैनाके साथे अब्बे विद्यार्थी एकातृत कैना आवश्यक रहल बटैली । उहाँ कहली, ‘पहिलेक तुल्नामे अब्बे सामुदायिक विद्यालयके शैक्षिक गुणस्तरमे सुधार हुइटी गैल बा । शिक्षकहुक्रे लेहल तालिम अनुसार विद्यालयमे मेहनत कैडेलेसे विद्यार्थीके शिक्षण सिकाईमे बृद्धि हुई ।’ गाउँपालिकासे कक्षा कोठा व्यवस्थापन, शिक्षण सामाग्रीमे सदैव सहयोग कैना उहाँ बटैली ।
कार्यक्रममे गाउँपालिकाके प्रमुख प्रशासकीय अधिकृत लक्ष्मीदत्त भट्ट स्थानीय तहमे एकीकृत प्रारम्भिक बालविकासके लाग योजना कार्यक्रम तथा अगामी योजना तर्जुमा समन्वय करके आघे बह्रना सुझाव डेलै ।

सेतो गुराँस राष्टिय वालविकास सेवा केन्द्रके कार्यकारी निर्देशक शसी विसि कार्यक्रममे सहजीकरण करल रहिट ।
कार्यक्रममे सक्कु वडा अध्यक्षहुक्रे, कार्यपालिका सदस्य, टमान शाखाके प्रमुख, वडा सचिवहुक्रे, कैलारी गाउँपालिका अन्र्तगत इसिडि कक्षा संचालन रहल विद्यालयके प्रअ, शिक्षक प्रतिनिधिहुकनके सहभागिता रहल रहे । कार्यक्रम संचालन गाउँपालिकाके सामाजिक विकास शाखा प्रमुख यगम कलेल करल रहिट ।

कैलारी गाउँपालिकामे शैक्षिक गुणस्तर अभिवृद्धि कैना करैना माध्यम– क्रियाशील बालविकास पद्दतिमे आधारित घुम्ती बैठक संचालन करटी आइल बा । युनिसेफ नेपालके आर्थिक सहयोग, सेतो गुराँस राष्टिय वालविकास सेवा, कैलारी गाउँपालिका ओ पीसविन कैलालीके संयुक्त साझेदारीमे सञ्चालित ‘नेपालमा प्रारम्भिक बालशिक्षा र विकासको सवलीकरणका लागि प्रारम्भिक सिकाइ तथा विकास मापदण्ड कार्यान्वयन परियोजना’ अन्र्तगत बालबालिकाके लाग शैक्षिक मुल्यांकनके साथे निर्माणात्मक मूल्यांकन स्रोत पुस्तिकामे आधारित क्रियाशील बालविकास पद्दति घुम्ति बैठक सञ्चालन करटी आइल रहे ।

क्रियाशिल वालविकास सञ्चालनके लाग कैलारी गाउँपालिका अन्र्तगत ९ वडाके ४८ ठो विद्यालयके प्रारम्भिक बालविकास शिक्षक तथा कक्षा १ मे अध्यापन करैना शिक्षकहुकनके अलग अलग क्लष्टर स्तरके समुह गठन करल रहे । ओ प्रत्येक २ महिनामे १ चो घुम्ती बैठक सञ्चालन करटी आइल बा ।

प्रारम्भिक बालविकासके टमान कार्यक्रम सञ्चालन कैना क्रममे व्रिmयाशील बालविकास पद्दतिहे एक ठो अलगे कार्यक्रम नइहुके गुणस्तर अभिवृद्धि कैना करैना माध्यमके रूपमे लेहल बा । प्रारम्भिक बालविकास केन्द्र तथा कक्षा १ हे गुणस्तरता प्रदान कैना क्रियाशील बालविकास पद्दतिसे बालबालिका, सरोकारवाला, समुदाय, अभिभावक, व्यवस्थापन समिति, सहजकर्ता, कक्षा एकके शिक्षक, बालशिक्षक सक्रिया करैना कार्य करल बा । बालबालिकाके सर्वाङगीण विकासके अधिकारहे संरक्षण तथा सम्बद्र्धनके लाग विशेष महत्व डेना कार्यमे यी प्रक्रियासे कार्यक्रममे प्रभावकारीता नन्ना सहयोग पुगैले बा ।

बालविकास पद्दतिके उद्देश्य गर्भसे ८ बर्षसमके बालबालिकाके प्रारम्भिक सिकाइ तथा विकास (शारीरिक, बौद्धिक, सामाजिक, संवेगात्मक ओ भाषिक) के लाग वाल शिक्षक, कक्षा एकके शिक्षकके दक्षतामे सुधार कैना आवश्यक पर्ना वातावरण तयार कैना तथा उमेर अनुसार बालबालिकाके स्तरमापन करके ओइनके स्तर अनुसारके थप रणनीति कार्यान्वयन कैना करैना करल बा ।