जातके आधारमे विभेदः थारु अगुवा

पहुरा समाचारदाता
धनगढी, ३ जेठ । जातके आधारमे विभेदमे पारल थारु समुदायके अगुवाहुक्रे एक कार्यक्रममे गुनासो करले बटै ।

नीति फाउण्डेशन ओ इन्सेक सुदूरपश्चिम प्रदेश कार्यालय, धनगढीके सहकार्यमे थारु समुदायके मानव अधिकार अवस्थाके बारेमे बुधके रोज धनगढीमे हुइल छलफलमे जातके आधारमे विभेदमे पारल थारु अगुवाहुक्रे उ गुनासो करल रहिट ।

धनगढी उपमहानगरपालिका स्तरीय वडघर/भलमन्सा नगर कमितिके अध्यक्ष रोहित चौधरी थारु समुदायमे प्रथाके रुपमे चल्टी सामाजिक न्याय प्रणाली बडघर÷भलमन्सा प्रथाहे थारु समुदाय रहल कारण कानूनी मान्यता नइडेके विभेद करल बटैलै । उहाँ कहलै—‘गाउँके विकासके लाग थारु समुदाय बडघर÷भलमन्साके अगुवाईमे निःशुल्क रुपमे विकास निर्माणके कार्य हुइटी आइल हुइलेसेफे सरकारसे कानूनी मान्यता डेहे पर्ना मने विडम्बना राज्यसे उ प्रथा स्विकार नइकरके विभेद करटी रहल बा ।

कौनोफे योजना भल्मन्सा मार्फत करे सेक्ना अवस्था रहठ, उहाँ कहलै, ‘मने भल्मन्सा प्रथामे नइटेरके टोल विकास संस्था, उपभोक्ता समिति बनाके कामहे आघे बह्रैना करल बा । मनै जुटाडेना, खबर कैना बेला बेला भल्मन्सा चाहना मने पैसा अइना योजनामे बाइपास कैना करल बा ।’

थारु अगुवा प्रभात चौधरी टिकापुर हिंसात्मक घटनापाछे प्रहरी प्रशासनसे थारु समुदायप्रतिके बुझाई, हेर्ना दृष्टिकोण ओ कैना व्यवहार फरक हुइल ओरसे थारु समुदायके व्यक्तिहुक्रे प्रहरीमे जाई डरैना करल बटैलै ।

थारु युवा ठाकुरप्रसाद करियाप्रधान प्रहरी प्रशासनमे उच्च ओहोदा थारु समुदायके प्रतिनिधित्व नइहुइल कारण पहुँच हुई नइसेक्के शान्ति सुरक्षाका अनुभूति करे नइसेकल बटैलै ।

उहाँ कहलै— ‘गरिबी, अशिक्षाके कारण थारु समुदाय पहिलेसे सोझासाझा हुइल कारण प्रहरीसे डरैना, नुक्न हुइलेसेफे अब्बेक अवस्थामे कुछ परिवर्तन हुइल मने प्रयाप्त नइहुइल ओरसे साझा बुझाई तथा सामाजिक सदभाव कायम करेक लाग थारु समुदाय ओ प्रहरी विच अन्तरकृया हुई आवश्यक बा ।

महिला अधिकारकर्मी गीता चौधरी टमान हिंसामे परल महिलाहुकनके मुद्दा प्रहरीसे दर्ता करे नइमानल कारण महिलाहुक्रे न्यायके लाग समस्या झेले परल बटैली ।

नेपाल पत्रकार महासंघ कैलालीके सचिव प्रेम चौधरी सामाचारके लाग सूचना संकलनके क्रममे थारु हुइल कारण टमान विभेद भोगे परल बटैलै । उहाँ कहलै थारु भाषाके पत्रिका हुइल कारण कार्यालय राजनितिक आन्दोलनके क्रममे फरक दृष्टिसे हेरल बटैलै ।

थारु कल्याणकारिणी सभा कैलालीके निवर्तमान कार्यवाहक सभापति माधव चौधरी भल्मन्सा ऐनके लाग प्रदेश सरकार मस्यौदा बुझाइल मने ओकर सुनुवाई नइहुइल बटैलै । उहाँ प्रदेश लोक सेवा आयोगमे थारु कोटा छुटयइनामे कन्जुस्याई करल बटैलै । महिला अगुवा तारा चौधरी थारु समु्दायके यूवाहुक्रे लागु औषधके दुव्र्यशनीमे फस्टी गैल बटैली ।

इन्सेक सुदूरपश्चिम प्रदेश संयोजक खडकराज जोशी देशके शान्ति सुरक्षाके अवस्था ओ थारु समुदायके मानव अधिकारके अवस्था तथा थारु समुदायके सुरक्षा ओ न्यायमे पहुँचके अवस्थाके बारेमे नीति फाउण्डेशनसे अध्ययन करे खोजल बटैलै । मुलुकमे सक्कु जातजाती बराबर हक अधिकार रहल कहटी जाति वर्गके आधारमे कुहीहे भेदभाव करे नइमिल्ना बटैली ।

नीति फाउण्डेशनके प्रतिनिधि तथा मानव अधिकारकर्मी शोभाकर बुढाथोकी शान्ति सुरक्षाहे कायम कैना प्रदेश सरकारके मातहटमे रहना करके सातु प्रदेशमे प्रदेश प्रहरी मस्यौदा तयार करके प्रदेश सरकारहे बुझैना काम हुइलेसेफे प्रदेश प्रहरीके कानून निर्माण ओ थारु समुदायके सुरक्षाके विषयमे निरन्तर लग्टी रहल बटैलै ।

नीति फाउण्डेशनके प्रतिनिधि तथा पुर्व एआइजी बमबहादुर भण्डारी थारु समुदायप्रति कैना राज्यसे विभेदपूर्ण व्यवहारसे समाजमे दुसर द्वन्द्व निम्त्यइना अवसथा हुई सेक्ना हुइल ओरसे राज्यसे यी समुदायके माग सम्बोेधन हुइना करके ऐन कानून निर्माण कैना आवश्यक सल्लाह सुझाव डेहे सेक्ना बटैलै ।