मुख्यमन्त्री सोडारीहे विश्वासके मत प्राप्त
पहुरा समाचारदाता
धनगढी, ३ जेठ । सुदूरपश्चिम प्रदेशके मुख्यमन्त्री दीर्घबहादुर सोडारी प्रदेशसभासे विश्वासके मत प्राप्त करले बाटै । बिफेक रोज प्रदेशसभामे विश्वासके मतके लाग उहाँसे पेस करल प्रस्तावके पक्षमे २८ ओ विपक्षमे शून्य मत विभाजन हुइल ओरसे मुख्यमन्त्री प्रदेश सभासे बहुमत प्राप्त करल सभामुख भीमबहादुर भण्डारी जानकारी डेलै ।
५३ सदस्यीय सुदूरपश्चिम प्रदेशमे बहुमत प्राप्तीके लाग २७ जनहनके समर्थन आवश्यक परठ् । मतदानमे २८ जाने प्रदेश सभा सदस्य सहभागिता जनाइल रहिट । विपक्ष ओ तटस्थमे शून्य मत परल सभामुख भण्डारी जानकारी डेलै ।
नेकपा (एकीकृत समाजवादी) पार्टीके सोडारी वैशाख ६ गते संविधानके धारा १६८ के उपधारा २ बमोजिम सुदूरपश्चिम प्रदेशके मुख्यमन्त्री नियुक्त हुइल रहिट । उहाँ नेकपा (एमाले), नेकपा (माओवादी केन्द्र), नागरिक उन्मुक्ति पार्टीके दुई जाने प्रदेश सभा सदस्य ओ एक स्वतन्त्र प्रदेश सभा सदस्यके समर्थनमे मुख्यमन्त्री बनल हुइट ।
मुख्यमन्त्री नियुक्तिके प्रक्रिया असंवैधानिक रहल कहटी नेपाली कांग्रेस ओ नागरिक उन्मुक्ति पार्टीके पाँच जाने सदस्य विरोध जनाइल रहिट । उहाँहुक्रनके विरोधके बाबजुद मुख्यमन्त्री सोडारी विश्वासके मतके लाग सदनमे प्रस्ताव पेस करल रहिट ।
