राजवंशीठाकुर थारुनके पहिल गोटियार मिलन उसरल
पहुरा समाचारदाता
धनगढी, १९ जेठ । राजवंशीठाकुर थारुनके कृष्णपुर ६ बन्जरिया कंचनपुरमे पहिल गोटियार मिलन हुइल बा । टमान गाउँमे रहल सक्कु गोटियारिनहे भेला कैके सम्मेलन हुइल हो ।
कार्यक्रमके सहभागीनहे सुभकामना डेटी सिंगपुरके अगुवा जोगराज चौधरी पहिल मिलन कार्यक्रम कैलकमे अइना दिनमे ढेर काम कर्टी जैना बटैलैं । उहाँ कहलैं, ’आब सक्कु गोटियार एकजुट होके आघे बर्हब ओ गोटियारिनके लाग सीप मुलक काम कर्टी जाब ।’
बन्जरिया गाउँके बुद्धिजीवी वीरबहादुर राजवंशी इ बेला हमार संस्कृति ओ पहिचान खोज्ना बेला हो । उहाँ कहलैं ’राजवंशीठाकुर थारुनके संस्कृति, संस्कार, परम्परा, चालचलन लिखित रुपमे अखिलेख ढारे पर्ना बा ।’
इहे सम्मेलनसे जोगराज चौधरीके अध्यक्षतामे ७ सदस्यीय लावा कार्यसमिति फेन बनल बा । जेकर उपाध्यक्षमे अनिल चौधरी, सचिवमे वीरबहादुर राजवंशी, कोषाध्यक्षमे मान बहादुर चौधरी, सदस्यमे जंगबहादुर चौधरी, धनिराम चौधरी, रितु चौधरी सर्वसहमतिसे चुनगैल बटैं ।
कार्यक्रममे बन्जरियाके भलमन्सा वीरबहादुर चौधरी, सिंङ्गपुर के बुद्धिजीवी, बुद्धिराम चौधरी, बुद्धिजीवी धनिप्रसाद चौधरी लगातत पहुना सहभागी हुइल रहिंट ।
खुशीराम चौधरीके घरगोसियाइमे हुइल कार्यक्रम संचालन राजकुमार चौधरी कर्ले रहिंट । इ कार्यक्रममे बर्का बन्जरिया, छुट्की बन्जरिया, सिंगपुर, देखतभुली, बेलौरी सिंगपुर, खल्हुवा बाँरी, लगायत टमान गाउँसे सहभागी हुइल रहिंट ।
