थारु राष्ट्रिय दैनिक
भाषा, संस्कृति ओ समाचारमूलक पत्रिका
[ थारु सम्बत ०५ असार २६४८, मंगर ]
[ वि.सं ५ असार २०८१, मंगलवार ]
[ 18 Jun 2024, Tuesday ]

सुत्केरी महिला पैलैं पोषण खाद्यन्न ओ हाइजेनिक किटस उपहार

पहुरा | २१ जेष्ठ २०८१, सोमबार
सुत्केरी महिला पैलैं पोषण खाद्यन्न ओ हाइजेनिक किटस उपहार

पहुरा समाचारदाता
हसुलिया, २१ जेठ ।
कैलारी गाउँपालिका वडा नम्बर २ ओ आठके सुत्केरी महिलाहुक्रे पोषणयुक्त खाद्यन्न ओ हाइजेनिक किटस झोला उपहार पैले बटै ।

कैलारी गाउँपालिकाके आर्थिक सहयोगसे ‘सुत्केरी महिलाहुकनके लाग उपाध्यक्षसंग पोषण विशेष कार्यक्रम’ अन्र्तगत चालु आर्थिकमे बसौटी स्वास्थ्य चौकी ओ उदासीपुर प्रथामिक स्वास्थ्य केन्द्रमे बच्चा जन्माइल सुत्केरी महिलाहुकनहे पोषणयुक्त खाद्यन्न ओ हाइजेनिक किटस झोला उपहार थारु महिला संजाल कैलारीसे डेगिल हो ।

पोषणयुक्त खाद्यन्न ओ हाइजेनिक किटस झोला उपहार गाउँपालिका उपाध्यक्ष भगवतीकुमारी चौधरी सोम्मारके रोज एक कार्यक्रमके विच हस्तान्तरण करल रही । सुत्केरी महिलाहुकनके लाग उपाध्यक्षसंग पोषण विशेष कार्यक्रम अन्र्तगत सुत्केरी महिलाहुक्रे पोषणयुक्त खाद्यन्न ओ हाइजेनिक किटस झोला उपहार औरे वडामे डेसेकल ओरसे बाँकी रहल वडामे वितरण कैटी रहल हो ।

सुत्केरी महिलाहुकनके पोषणयूक्त पैलेसे ओइनके स्वास्थ्य मजा रना ओ बच्चाहुकनहे स्वास्थ्य बनैना उद्देश्यके साथ यी कार्यक्रम लागु करल गाउँपालिका उपाध्यक्ष बटैली ।

उपहार झोलामे पोषणयूक्त खाद्यन्न टमान मेरिक गेडागुडी, घिउ ओ हाइजेनिक किटसमे बच्चा ओ सुत्केरी महिलासे प्रयोग कैना टमान मेरिक सामान रहल कैलारी गाउँपालिका स्वास्थ्य शाखाके सिअनमी अनिता चौधरी बटैली । सुत्केरी महिलाहुकनके उपहारसहित ओकर प्रयोगबारे जानकारीफे डेगिल उहाँ बटैली ।

गर्भवती अवस्थासे सुत्केरी हुइटसम बसौटी स्वास्थ्य चौकी ओ उदासीपुर प्रथामिक स्वास्थ्य केन्द्रमे नियमित चेकजाँच ओ चालु आर्थिक बर्षके साउन महिनासे अब्बेसमे उहे स्वास्थ्य संस्थामे बच्चा जन्माइल सुत्केरी महिलाहुकनके पोषणयुक्त खाद्यन्न ओ हाइजेनिक किटस झोला उपहार डेटी रहल उहाँ बटैली । वडा नम्बर २ बसौती स्वास्थ्य चौकीमे ३१ जाने ओ उदासीपुर प्रथामिक स्वास्थ्य केन्द्रमे ५९ जाने सुत्केरी महिलाहुकनहे पोषणयुक्त खाद्यन्न ओ हाइजेनिक किटस झोला उपहार डेहल बा ।

सुत्केरी महिलाहुकनके उपहार वितरण कार्यक्रममे वडा नम्बर २ के वडा अध्यक्ष विकास चौधरी, वडा नम्बर ८ के वडा अध्यक्ष तारामल कठरिया, कार्यपालिका सदस्य सुनिला चौधरी, लालबहादुर विक, सम्बन्धित स्वास्थ्य संस्थाके कर्मचारी, थारु महिला संजाल कैलारीके अध्यक्ष सरिता चौधरी, कृष्णीदेवी चौधरी, अनिता चौधरी बोहरा, अनिता चौधरी, गीता चौधरी, आरती चौधरीलगायतके उपस्थिति रहे ।

जनाअवजको टिप्पणीहरू