एसपीए कलेजसे टी–२० विश्वकपमे नेपाली क्रिकेटरके हरेक रनमे १० ओ विकेटमे २० टेलुवा लगैना
पहुरा समाचारदाता
धनगढी, २१ जेठ । धनगढी स्थित एसपीए कलेजसे टी–२० विश्वकपमे नेपाली क्रिकेटरहुकनके हरेक रनमे १० ओ विकेटमे २० टेलुवा लगैना हुइल बा ।
धनगढी उप–महानगरपालिकाके हरियाली धनगढी अभियानहे साथ डेटी ग्रिन क्लिन धनगढी बनैना कार्यके प्रवद्र्धन स्वरूप कलेजसे उ कार्य करे लागल हो ।
सोम्मार कलेजसे मेयर गोपाल हमालके नेतृत्वमे धनगढी उप–महानगरपालिकामे सुरु करल ‘हरियाली धनगढी’ अभियानहे साथ डेना धनगढी उप–महानगरपालिका क्षेत्र भिटर टी–२० विश्वकप २०२४ मे नेपालसे बनाइल प्रत्येक रनमे १० टेलुवा ओ विपक्षी टिम विरुद्ध लेहल प्रत्येक विकेटमे २० टेलुवा (वृक्षारोपण) लगैना वाचा करले बा ।
वातावरण संरक्षणके लाग सदा कटिबद्ध रहन एसपीए कलेजके प्रबन्ध निर्देशक एवं धनगढी क्षेत्रमे वातावरण संरक्षणके लाग उदाहरणीय कार्य करटी आइल ग्रिन क्लीन धनगढी क्लवके समेत नेतृत्व करटी र्दै सुवास शाही उ कार्य कैना अपने उत्साहित रहल बटैलै । ‘हमार लक्ष्य हमार क्रिकेट टोलीहे समर्थन कैना केल नाही, हमार स्थानीय वातावरणमेफे महत्त्वपूर्ण योगदान पुगैना हो । हमरे आशा कैठी यी अभियानसे औरहेफे हरियाली धनगढी बनैना हमार प्रयासमे सामेल हुइना प्रेरित करी, शाही कहलै ।
जुन २ से अमेरिका ओ वेस्टइण्डिजमे हुइटी रहल टी २० विश्वकप क्रिकेट प्रतियोगितामे नेपाली टोलीके प्रदर्शन कैसिन रही कना नेपालके क्रिकेट प्रेमीहुक्रे उत्सुकतापूर्वक पर्खटी रहल परीपेक्षमे क्रिकेट जितके लाग केल नइहुके प्रत्येक रन ओ विकेटसे नन्ना सकारात्मक वातावरणीय प्रभावके लागफे यी वृक्षारोपण अभियानसे समाजमे उदाहरणीय भूमिका खेल्न कलेज परिवार विश्वास व्यक्त करले बा ।
साथे कलेजसे रोहितकुमार पौडेलके कप्तानीमे टी–२० विश्वकप खेल्न मैदानमे उटरल नेपाली क्रिकेट टोलीहे सफलताके कामना सहित हार्दिक शुभकामना व्यक्त करले बा ।
