महिलनके कामके सम्मान नइहोः गाउँपालिका उपाध्यक्ष

पहुरा समाचारदाता
हसुलिया, २२ जेठ । महिलाहुकनके कामके सम्मानके नैहुइल कैलारी गाउँपालिकाके उपाध्यक्ष भगवतीकुमारी चौधरी बटैले बटी ।

कैलारी गाउँपालिका महिला तथा बालबालिका शाखाके आयोजनामे हसुलियामे यिहे जेठ २० गतेसे सुरु हुइल ‘महिला समिति, सहकारी ओ वन उपभोक्ता समुहके पदाधिकारीहुकनके लाग नेतृत्व तथा क्षमता विकास’ तालिम समापन कार्यक्रममे उहाँ उ बाट बटवाइल रहिट ।

उहाँ कहली, ‘महिला समिति, सहकारी ओ वन उपभोक्ता समुहमे महिला कोटा छुटयाइलपाछे केल महिलाहुक्रे आइपाइल । मने महिलाहुक्रे निर्णय कैना ठाउँमे जाई नइपाइल हुइट ।’

महिलाहुक्रे घरमे बैठकके सक्कु मेरिक काम कैना मने ओकर सम्मान नइहुइल उहाँ बटैली । महिलाहुक्रे हिंसामे परल ओरसे आव नेतृत्व तहके अइना जरुरी रहल बटैली । कार्यक्रमके संचालन कैलारी गाउँपालिकाके महिला तथा बालबालिका शाखा बालकुमारी चौधरी ओ सहजीकरण सिडिसीके प्रतिनिधि करुणा चौधरी करल रही ।

तीन दिने तालिममे महिला समिति, सहकारी ओ वन उपभोक्ता समुहमे रहल महिलाहुकनके सहभागिता रहे ।