कृषक समुहहे कृषि सामाग्री हस्तान्तरण

कृषि विद्युतीकरणमे जोर डेले बटीः गापा अध्यक्ष

पहुरा समाचारदाता
हसुलिया, २४ जेठ । कैलालीके कैलारी गाउँपालिका–४ नम्बर संगम कृषक समुहहे कृषि सामाग्री हस्तान्तरण कैगिल बा ।
कैलारी गाउँपालिका कृषि विकास शाखाके आर्थिक सहयोग १ लाख १२ हजार ५ सय ओ संगम कृषक समुहके लगानी १ लाख १२ हजार ५ सय करके कुल लागत २ लाख २५ हजारके मकै बाली प्रवद्र्धन कार्यक्रमके सामाग्री हस्तान्तरण तथा सार्वजनिक सुनुवाई कार्यक्रम हुइल हो ।

गाउँपालिका अध्यक्ष राजसमझ चौधरीके वरका पहुनामे हुइल एक कार्यक्रममे विच उहाँ संगम कृषक समुहहे मकै बाली प्रवद्र्धन कार्यक्रमके लाग ६ ठो पानी मोटर, ६ ठो स्प्रे टंयाकी ओ पानी डर्ना प्लाष्टिक पाइप हस्तान्तरण करल बा ।
कार्यक्रममे सम्बोधन करटी गाउँपालिका अध्यक्ष संगम कृषक समुहसे सुरु करल मकै बाली मजा हुइल बटैलै । उहाँ कहलै, ‘उत्पादनहे व्यवसायीकरण करलेसे आम्दानी बह्राई सेक्जाई । मकैके ठोठाहे पकाके विक्री करेसेक्लेसे मजा आम्दानी करे सेक्जाइठ ।’ उत्पादन हुइल मकैहे सेक्लेसे अपने गाउँठाउँमे बजारीकरण करे परल या लग्गेक पालिका धनगढीमेफे विक्री करे सेक्जाइठ उहाँ बटैलै ।

हम्रे पुर्खौैसे खेती करटी आइल बटी,’ गाउँपालिका अध्यक्ष कहलै,‘जमिनके सदयोग उत्पादन हुइल बस्तुहे बजारीकरण करे नइसेकट हुई । हमार यहाँ प्रशस्त जग्गा जमिन बा, ओकर सदुपयोग करे परल । हमार गाउँठाउँमे बगर खेती करके भारतीयहुक्रे मजा उत्पादन ओ मनग्य आम्दानी कमाके जाइटे । मने हमार खेतुवा, डिहुवा खाली रहठ हम्रे मिर्चाफे लगाई नइसेक्ठी । ओइनहे बगर खेतीमे मजदुरके रुपमे काम करे जैठी ।’ यहाँके स्थानीय बगर खेती करले गाउँपालिकासे अनुदानफे डेजाई ।’

गाउँपालिकासे कृषिहे ढेर प्रथामिकता डेहक लाग कृषि विद्युतीकरणमे जोर डेहल उहाँ बटैलै । पहिल चरणमे वडा नम्बर ५ ओ ७ हे सुरुमे कैना कहल रहे मने आर्थिक मण्डीके कारण विस्तार कैनामे अवरोध हुइल उहाँ बटैलै । कृषकके पिरमार्कहे बुझी गाउँपालिकासे मालपोतमे आधा छुट करलफे उहाँ बटैलै ।

कार्यक्रममे वडा नम्बर ४ के कार्यवाहक वडा अध्यक्ष सोभा परियार संगम कुषक समुहसे कैगिल मकै खेती मजा रहल ओरसे उहीहे निरन्तरता डेहे पर्ना बटैलै । मकै खेती मजासे करेसेक्लेसे आम्दानी करे सेक्ना उहाँ बटैली । संगम कृषक समुहके सचिव बासुराम चौधरी आयव्यय सार्वजनिक करल रहिट ।

समुहके अध्यक्ष सन्तराम चौधरीके अध्यक्षतामे हुइल कार्यक्रममे संचालन दासीराम चौधरी ओ स्वागत मन्तव्य समुहके सदस्य महावली चौधरी करल रहिट । समुहहे मकै बाली प्रवद्र्धनके कृषि सामाग्री हस्तान्तरण कार्यक्रममे वडा नम्बर ४ के वडा सदस्य हरिद्वारी चौधरी, कैलारी गाउँपालिकाके सामाजिक विकास विकास शखाके प्रमुख यगम कलेल, कृषि विकास शाखामे प्रमुख मैया चौधरी, पशु विकास शाखा प्रमुख सुर्य प्रसाद चौधरी ओ कृषि विकास शाखाके अधिकृत आशिष चौधरी, गाउँक भल्मन्सा, समुहके सदस्यहुकनके सहभागिता रहे ।