थारु राष्ट्रिय दैनिक
भाषा, संस्कृति ओ समाचारमूलक पत्रिका
[ थारु सम्बत ०५ असार २६४८, मंगर ]
[ वि.सं ५ असार २०८१, मंगलवार ]
[ 18 Jun 2024, Tuesday ]

सामुदायिक मेलमिलाप कर्ताहुकनके लाग आठ दिवसिय तालिम सुरु

पहुरा | २५ जेष्ठ २०८१, शुक्रबार
सामुदायिक मेलमिलाप कर्ताहुकनके लाग आठ दिवसिय तालिम सुरु

पहुरा समाचारदाता
धनगढी, २५ जेठ ।
कैलारी गाउँपालिकाके सामुदायिक मेलमिलाप कर्ताहहुकनके लाग आठ दिवसिय तालिम सुरु हुइल बा ।
कैलारी गाउँपालिकाके आयोजना ओ प्राकृतिक श्रोत द्वन्द रुपान्तरण केन्द्र नेपालके सहजीकरणमे शुकके रोज थारु होम स्टे गाउँ भादामे कैलारीके १ से ९ वडाके सामुदायिक मेलमिलापहुकनके लाग तालिम सुरु हुइल हो ।

कैलारी गाउँपालिका उपाध्यक्ष भगवतीकुमारी चौधरीके अध्यक्षतामे हुइल कार्यक्रममे उहाँ मेलमिलापकर्ताहुक्रे आठ दिवसिय तालिम पाछे विवाद मिलैना सहजुल हुइना बटैली । उहाँ कहली, ‘न्यायिक समितिमे ढेर विवाद दर्ता हुइलेसे छोट–छोट मुद्दा मेलमिलाप केन्द्रमे पठाजाइठ । एकसे नौ वडाभिटर मेलमिलाप केन्द्र गठन हुइल बा । यी तालिमसे विवाद मिलैना सहजता प्रदान हुई सेकी ।’

कैलारी गाउँपालिकाके सामाजिक विकास शाखा प्रमुख यगम कलेल सामुदायिक मेलमिलापकर्ताहुकनहे आठ दिवसिय तालिम लेहे पर्ना जरुरी रहल बटैलै । यी तालिमसे बादविवाद मिलैना प्रक्रियाके ज्ञान प्राप्त हुइना उहाँ बटैलै ।

कार्यक्रममे स्वागत मन्तव्य न्यायिक समिति सदस्य हरिद्वारी चौधरी ओ संचालन न्यायिक समितिके अनिल चौधरी करले रहिट । जेठ ३२ गतेसम संचालन हुइना तालिममे प्रशिक्षण प्राकृतिक श्रोत द्वन्द रुपान्तरण केन्द्र नेपालके क्षेत्रीय संयोजक बल्लु चौधरी ओ प्राकृतिक श्रोत द्वन्द रुपान्तरण केन्द्र नेपालके अधिवक्ता त्रिपुरा गिरी डेटी रहल बटै ।

जनाअवजको टिप्पणीहरू