देशमे रोजगारी सिर्जनाके लाग श्रमाधान मेला महत्वपूर्णः मन्त्री भण्डारी

पहुरा समाचारदाता
धनगढी, २८ जेठ । उद्योग, वाणिज्य तथा आपूर्तिमन्त्री दामोदर भण्डारी देशभित्रे रोजगारी सिर्जना करक लाग श्रमाधान मेलाके महत्वपूर्ण भूमिका रहल बटैले बाटै ।

श्रम, रोजगार तथा सामाजिक सुरक्षा मन्त्रालय, सुदूरपश्चिम प्रदेश सामाजिक विकास मन्त्रालय ओ धनगढी उपमहानगरपालिकाके आयोजनामे अँट्वारके धनगढीमे आयोजित श्रमाधान रोजगारी मेलाके उद्घाटन सत्रमे उहाँ रोजगारी सिर्जनाके आन्तरिक ओ बाह्य दुई आयाममे देशभित्रे रोजगारी तथा स्वरोजगारी सिर्जना कैना कार्यसँग उद्योग मन्त्रालय ढेर सरोकार रख्ना बटैलै ।

रोजगारी प्रवर्द्धनके रूपमे रहल औद्योगिक क्षेत्रके समग्र वातावरण सुधार कैना लगानीसँग सम्बन्धित कानुनमे आवश्यक परिमार्जन कैना आवश्यक रहल मन्त्री भण्डारी धारणा व्यक्त करल रहिट । मुलुकमे सक्कु सरकारी, सहकारी ओ राज्यबिच किल नैहोके शासकीय साझेदारीके रूपमे रहल निजी क्षेत्र तथा गैरसरकारी क्षेत्रमे समेत सहकार्य ओ साझेदारी करे पर्र्ना अभियानमे श्रम मन्त्रालयके महत्त्वपूर्ण सुरुआत रहल उहाँ उल्लेख करलै ।

कार्यक्रममे प्रदेशका भूमि, व्यवस्था कृषि तथा सहकारी मन्त्री टीका थापा दिनप्रतिदिन वैदेशिक रोजगारीके लाग पलायन हुइटी रहल युवाके लाग इ मेरके श्रमाधान मेलाके अपरिहार्य भूमिका हुइना बटैली । उहाँ स्वदेशमे रोजगारी सिर्जना करक लाग तीनु तहके सरकारबिच सहकार्य हुइ पर्नामे जोड डेलै । नगरप्रमुख गोपाल हमाल बेरोजगार युवाहे रोजगार बनाइक लाग इ मेला प्रत्येक बरस आयोजना करे पर्ना धारणा व्यक्त करल रहि । सुदूरपश्चिम प्रदेशके गरिबी हटाइक लाग राज्यसे लगानी बह्राइ पर्ना उहाँके धारणा रहे ।

नेपाल तालिम तथा रोजगार व्यवसायी महासङ्घ सुदूरपश्चिमके अध्यक्ष प्रमोद पाठक रोजगारदाता आवश्यकताअनुसार श्रमिक नैपैना अवस्थाहे इ मेरके मेलासे सम्बोधन कैना बटैलै । नेपालमे काम कैके खौना वातावरण सिर्जना कैना, आन्तरिक रोजगारी सिर्जना ओ यहाँके रोजगारीके अवस्था बुझक लाग मेलासे थप सहयोग कैना अध्यक्ष पाठकके कहाइ रहे ।

धनगढीमे जेठ २७ ओ २८ गते दुई दिनसम सञ्चालन हुइना मेलामे हालसम ३७ निजी क्षेत्रके परामर्श कक्ष रहल बावै ।
मेलामे रोजगारी सिर्जनाके लाग दुई हजार छ सय ६४ जनहनके माग रहल बा कलेसे हालसम करिब पाँच हजार व्यक्तिके निवेदन परल आयोजक जनैले बा । मन्त्रालयसे आयोजना करल श्रमाधान रोजगार मेलाके सहआयोजकके रूपमे चेम्बर अफ कमर्स सुदूरपश्चिम प्रदेश, नेपाल उद्योग वाणिज्य महासंघ, नेपाल उद्योग परिसंघ, होटल संघ नेपाल, नेपाल तालिम तथा रोजगार महासंघंघ, नेपाल घरेलु तथा साना उद्योग व्यवसाय महासंघ रहल बावै ।

मेलामे टमान कार्यशाला सञ्चालन हुइना बावै । सुरक्षित आप्रवासन रोजगारीके लाग कार्यस्थलमे आधारित सिकाइ, वैदेशिक रोजगारीके चुनौती, अवसर ओ प्रभाव, वैदेशिक रोजगारीमे स्वच्छ भर्ना प्रक्रिया, अन्तर्राष्ट्रिय श्रम सम्बन्ध ओ कानुन, सामाजिक सुरक्षा एवम् आन्तरिक रोजगारीके विषयक कार्यशाला सञ्चालन हुइना जनाइल बा ।