बेहडाबाबा मन्दिरमे दर्शनार्थीके भीड

धनगढी ओ कैलारीमे एक दिन स्थानीय विदा

पहुरा समाचारदाता
धनगढी, २ जेठ । कैलालीके धनगढी उपमहानगरपालिका–१६ रामपुर गाउँमे अवस्थित प्रसिद्ध बेहडाबाबा मन्दिरमे पूजाआजा कैना दर्शनार्थीके अँटवारके सकारेसे भीड लागल बा ।

जेष्ठ शुक्ल दशमी गंगा दशहराके अवसरमे पूजाआजा कैना दर्शनार्थीके भिडभाड लागल हो । यी अवसरमे बेहडाबाबा मन्दिर परिसरमे गंगा दशहरा मेलाफे लागल बा । मन्दिरमे पूजाआजा कैना ओ मेला हेरुइयाके भीड लागल मन्दिर व्यवस्थापन समितिके अध्यक्ष पदमराज जोशी जानकारी डेलै ।

उहाँके अनुसार नेपालीसहित भारतीय दर्शनार्थी भक्तजन पूजाआजाके लाग अइना क्रम जारी बा । प्रसिद्ध यी मन्दिरके दर्शन ओ पूजाआजाके लाग नेपाल, भारत दनु देशके श्रद्धालु अइना करल बटै ।

बेहडाबाबामे गंगा दशहरा, चैत अमावस, माघी, शिवरात्री ओ नयाँ सालमे भक्तजनके भिड हुइठ करठ । ओस्टेक करके साउन महिनाके सक्कु सोम्मार भक्तजन अइना करल समितिके अध्यक्ष जोशी जानकारी डेलै ।

गंगा दशहराके अवसरमे धनगढी उपमहानगरपालिका ओ कैलारी गाउँपालिकासे अँटवारके रोज स्थानीय विदा डेहल बा ।

बेहडाबाबाके महिमा

भारतके उत्तर प्रदेशस्थित गोला स्थानके ग्वालासे बेहडाबाबाके पत्ता लगाइल विश्वास करजाइठ । मन्दिर व्यवस्थापन समितिके अध्यक्ष जोशीके अनुसार राणाकालीन समयमे कैलालीके डमौलिया ओ धुरजन्ना क्षेत्रमे गोलाके ग्वाला गैयागोरु चराई आइल रहिट ।

उ मध्ये एक ग्वालाके गैया बच्चा जन्मैलेसेफे घरमे दुध डेना करल नइरहिट । गैया दुध नइडेना करल रहस्य खोज्टी जाईबेर गैयासे हालके बेहडाबाबामे रहल शिव लिङगामे अपन दुध चुहैना करल तथ्य भेटगिल । पाछे ग्वालासे फुटाके शिलाहे भारत लैजाई खोजेबेर नैसेक्लै । लिङगासे रगत आइल डेखलपाछे उहे छोरके पूजापाठ सुरु करल मन्दिर व्यवस्थापन समितिके अध्यक्ष जोशी बटैलै ।

ओइने लिङ लग्गसे छोट ढुङगा लैजाके गोलामे छोट मन्दिर बनैले बटै । उहाँ कहलै, ‘उहाँ बनाइल मन्दिरफे बेहडाबाबा हो ।” ग्वालाहुकन गैयाके बथानहे उ बेला ‘बेहडा’ कहिजाई । यिहे नामसे पाछे मन्दिरके नाउ बेहडाबाबा रहे गैल हो । भारतके ग्वालासे बेहडाबाबा पत्ता लगाइल कारण यी प्रति ओइनके ढेर श्रद्धा रहल ओ बर्सेनी पूजाअर्चना करे अइना करल जोशी बटैैलै ।

बेहडाबाबाहे धनगढी उपमहानगरपालिकासे धार्मिक पर्यटकीय क्षेत्रके रुपमे विकास करटी आइल बा । यम्ने भौतिक संरचना थप्ना क्रम जारी रहल बा । जलाशयमे स्थान करके चोखा मनले बेहडाबाबाके दर्शन करलेसे सक्कु जानेक मनोकामना पूरा हुइना विश्वास भक्तजन रहटी आइल बा । गंगा दशहरामे बेहडाबाबा मन्दिर परिसरमे पाँच दिन मेला लग्ना करठ । बेहडाबाबा मन्दिर धनगढी बजारसे करिब १२ किलोमिटर पूर्व उत्तर परठ ।