सरकार सुशासन, समृद्धिके पक्षमे केन्द्रित बाः मन्त्री शर्मा
पहुरा समाचारदाता
धनगढी, ८ असार । सञ्चार तथा सूचना प्रविधि मन्त्री रेखा शर्मा सरकार सूचना प्रविधि दशक अभियानके तयारीमे लागल बटैले बाटी । प्रेस सेन्टर कैलालीसे शनिच्चरके धनगढीमे आयोजित पत्रकार सम्मेलनमे मन्त्री शर्मा उ बात बट्वाइल हुइटी ।
मन्त्री शर्मा ओकर लाग सरकारी कार्यदल बनाके दश वर्षे गुरुयोजना निर्माण कैना बटैली । उहाँ सूचना प्रविधि दशक अभियानसे निजी क्षेत्र उत्साहित रहल ओ सूचना प्रविधिहे व्यवस्थित बनाइ सेक्लेसे अर्बौँ राजस्व भित्र्याइ सेक्ना बटैली ।
मन्त्री शर्मा मिडिया काउन्सिल ऐन संसदमे रहल ओ सामाजिक सञ्जालसम्बन्धी विधेयक, आमसञ्चार विधेयक दर्ता प्रक्रियामे रहल तथा दूरसञ्चार ऐनके ड्राफ्ट तयार हुइल जानकारी डेली । आमसञ्चारसम्बन्धी सक्कु विधेयक, कानुन पारित हुइलमे पत्रकारिता क्षेत्रमे पुनर्संरचना हुइना विश्वास व्यक्त करली ।
सरकारके प्रवक्तासमेत रहल सञ्चार तथा सूचना प्रविधि मन्त्री शर्मा सरकारसे सुशासन, समृद्धि, सामाजिक न्यायके पक्षमे केन्द्रित होके काम करटी रहल बटैली । जनताके आशा ओ अपेक्षाहे सम्बोधन हुइना मेरके सरकारसे मजा काम करटी रहल ओ उहीसे जनताहे आशावादी बनाइल ओहकान कहाइ रहल बा ।
जनअपेक्षा अनुसार समयमे पाठ्यपुस्तक, मलखादके वितरण लगायतके कामहे सरकारसे व्यवस्थित ढंगसे आघे बह्राइल उहाँके कहाइ रहे । ओस्टके, ललिता निवास प्रकरण, भुटानी शरणार्थी, सुन काण्ड लगायतमे अडिग होके सरकार काम करल ओ उहीसे जे हुइलेसे फेन सजायके भागीदार हुइठ् कना स्थापित करले बा ।
पत्रकारके जिज्ञासामे मन्त्री शर्मा सरकारसे विपद् व्यवस्थापनके लाग पूर्व तयारीके काम करटी रहल सञ्चारमाध्यम मार्फत विपद् सचेतना सामग्री प्रसारणके व्यवस्था करल बटैली । ओस्टके, बजेटके कारण सरकार टरेउप्पर नैहुइ, उ सम्भावना नैहो, वर्तमान गठबन्धन राजनीतिक स्थायित्व डेना मेरके पूरै अवधि लैजैना सहमति हुइल ओहकान दावी रहल बा ।
सरकार बजेट निर्माणके प्रक्रिया बा, विनियोजन उपर छलफलमे बा, ओहेमारे बजेट हाली पारित हुइना ओहकान कहाइ रहे । बजेटमे डेखल कमिकमजोरीहे सुधार ९परिमार्जन० कैना प्रयत्न कैना समेत बटैली । सञ्चारकर्मीनके औरे जिज्ञासामे मन्त्री शर्मा राजदूत लगायतके नियुक्ति सरकारके नियमित प्रक्रिया हुइल ओरसे उ स्वाभाविक रहल उल्लेख कैटी उहीहे बजेटसँग जोर्ना उपयुक्त नैहुइना बटैली ।
मन्त्री शर्मा सामाजिक सूचना सन्देश प्रवाहके क्षेत्रमे चलचित्र क्षेत्र महत्त्वपूर्ण प्रभावकारी माध्यम रहल ओरसे सरकारसे शारिरीकरुपमे अपाङ्गता रहल कला क्षमता रहलहुक्रनहे फेन कला क्षेत्रमे जोर्ना मेरके सरकार लागल बटैली ।
