थारु राष्ट्रिय दैनिक
भाषा, संस्कृति ओ समाचारमूलक पत्रिका
[ थारु सम्बत ०२ सावन २६४८, बुध ]
[ वि.सं २ श्रावण २०८१, बुधबार ]
[ 17 Jul 2024, Wednesday ]

दलित विद्यार्थीहे पोशाक वितरण

पहुरा | २३ असार २०८१, आईतवार
दलित विद्यार्थीहे पोशाक वितरण

पहुरा समाचारदाता
धनगढी, २३ असार ।
जिल्लाके टीकापुर नगरपालिकासे दलित समुदायके विद्यार्थीहे विद्यालय पोशाक निःशुल्क वितरण करले बा ।

नगरपालिकासे टीकापुरके आठ सामुदायिक विद्यालयमे अध्ययनरत ८५ जाने बालबालिकाहे विद्यालय पोशाक वितरण करल हो । टीकापुरके राजिपुरके हिरा नगार्जीके कक्षा ७ मे पहु्रइया नटियाके इहीसे आघे एक जोर विद्यालय पोशाक रहे । पालिकासे एक जोर पोशाक उपलब्ध करैले बा ।

‘वर्षातमे फेर्र्ना पोशाक नैहोके सास्ती हुइटी आइल रहे । आब फेरके लगैना सहज हुइना बा’, उहाँ कहलै । जवाकला विकके चार नटियानटिनीया बाटै । दुईजाने पोशाक पाइलपाछे विद्यालय पठैना सहज हुइल उहाँ बटैलै । ‘छावा पटुहिया नैहुइट । आपनहे खैना तथा अन्य आवश्यक सामग्रीके जोहो कैना समस्या हुइल अवस्थामे पालिकासे पोशाक वितरण करलपाछे खुसी लागल बा’, उहाँ कहलै ।

पोशाक वितरण कैटी नगरप्रमुख रामलाल डगौँरा थारु सामुदायिक विद्यालयमे अध्ययनरत बालबालिकाके अभिभावक शिक्षामे ध्यान नैडेहल, बालबालिकाके लाग समय डेहे नैसेकल गुनासो करलै । बालबालिका पाछे पर्ना कहलक राज्य पाछे पर्ना हो । ‘उहाँहुक्रनहे पर्याप्त समय डेहे परल’, उहाँ कहलै, ‘अभिभावक फेन जिम्मेवार बने परल । विपन्न परिवारहे पोशाक तथा शैक्षिक सामग्री स्थानीय सरकारसे उपलब्ध करैना बा ।’

प्रमुख प्रशासकीय अधिकृत दमनसिँह चौधरी अव्यवस्थित बसोबास रहल क्षेत्रमे पालिकाहे सहयोग कैना कुछ असहज हुइना धारणा राखल रहिट । ‘शिविरमे रहल बालबालिकाहे सहयोग कैना कठिन बा’, उहाँ कहलै, ‘अभिभावकसे बालबालिकाके शिक्षामे ध्यान डेहलमे नगरपालिका तथा अन्य निकायमार्फत सहयोग कैना बा ।’

कार्यपालिका सदस्य दीपक निसानी दलित बालबालिका पोशाक अभावमे विद्यालय जैनासे वञ्चित नैहुइट कहिके पोशाक वितरण करल बटैलै । आगामी बरस फेन शैक्षिक सामग्री वितरण कैना कार्यक्रम रख्ले बाटी उहाँ कहलै, ‘विपन्न दलितके बालबालिकाहे पोशाक सहयोगसे हौसला मिल्ना अपेक्षा करले बाटी ।’

कार्यक्रममे कर्णालेश्वर आधारभूत विद्यालयके अध्यक्ष चन्द्रप्रसाद भण्डारी सिमान्तकृत, पाछे परल वर्ग समुदायके बालबालिकाहे आवश्यकताके आधारमे सहयोग कैना बटैलै ।

जनाअवजको टिप्पणीहरू