पहाडी जिल्ला जोर्ना राजमार्ग अवरुद्ध
पहुरा समाचारदाता
धनगढी, २३ असार । वर्षासँगे पहिरो गिरके जयपृथ्वी राजमार्ग अवरुद्ध हुइल बा । शुकसे निरन्तर परटी रहल वर्षासँगे आइल पहिरोसे जयपृथ्वी राजमार्ग अवरुद्ध होके सुदूरपश्चिमके पहाडी जिल्लामे जैना यातायात फेन अवरुद्ध हुइल बा ।
बझाङ ओ बैतडीके सीमा लग्गे पहिरो गिरके शनिच्चर रातसे बझाङसे धनगढी, महेन्द्रनगर ओर अइटी रहल बस तथा जिप ओ महेन्द्रनगर, धनगढीसे बझाङ जैटी रल सवारीसाधन डगरामे रुकल बावै ।
सुदूरपश्चिम प्रदेशके पहाडी जिल्लाके अन्य राजमार्ग पहिरोसे अवरुद्ध हुइल बावै । पहिरोसे सुदूरपश्चिम प्रदेशके पहाडी जिल्ला जोर्ना सडक ठाउँ–ठाउँमे अवरुद्ध होके सयौं यात्रु अलपत्र परल बाटै ।
सुदूरपश्चिम प्रदेश प्रहरी, कार्यालय धनगढीके अनुसार बझाङके तमेलमे पहिरो गैल बा । ओस्टके, जयपृथ्वी राजमार्गके तमेलमे पहिरोके कारण अवरुद्ध दार्चुलाके शैलेशिखर नगरपालिका–६ पर्नेवासमे पहिरो गैल बा ।
खोड्पे–दार्चुला मुख्य सडक पहिरोसे अवरुद्ध पारल बा । बैतडीके पाटन नगरपालिकाके साँणीघाँटीमे फेन जयपृथ्वी राजमार्ग बन्द हुइल बा । पहिरोके कारण बैतडीके सिँगास गाउँपालिका–९ बाजपानीमे फेन पहिरो गैल प्रहरीके कहाइ रहल बा ।
यहोर, डडेल्धुराके गन्यापधुरा गाउँपालिका–३ रुवाखोलुवामे फेन पहिरो गैल बा । रुवाखोलामे पहिरो गैलपाछे राजमार्ग बन्द हुइल बा । डडेल्धुराके अनारखोलीमे रुख्वा गिरल बा । रुख ढलल् ओरसे जोगबुढा–बुडर सडकके आलिताल गाउँपालिका–८ सुनखोलुवामे सडक अवरुद्ध हुइल बा ।
अछामके साँफेबगर नगरपालिका–१३ बुढाबगरमा पहिरोसे सडक अवरुद्ध हुइल बा । साँफे–मार्तडी सडक पहिरोके कारण अवरुद्ध हुइल बा । सुदूरपश्चिम प्रदेश प्रहरी कार्यालयके अनुसार पहिरो पन्छैना काम हुइटी रहल ओ डडेल्धुराके अनारखोलीमे अवरुद्ध सडक बैतडीमे अवरुद्ध सडक सुचारु होसेकल बा ।
सडक अवरुद्ध हुइल ठाउँमे सुरक्षाके लाग प्रहरी परिचालन करल प्रशासन कार्यालय जनैले बा । लगातार भारी वर्षा हुइटी रहल ओरसे आभिन बाढ पहिरोके जोखिम बह्रना कहटी सतर्कता अपनाइक लाग कैलाली, कञ्चनपुर, डडेल्धुरा, अछाम जिल्लाके प्रमुख जिल्ला अधिकारीहुक्रे अपिल करले बाटै ।
पहिरोमे परके दुईके मृत्यु
सुदूरपश्चिममे अविरल वर्षापाछे आइल बाढ ओ पहिरोमे परके दुई जनहनके मृत्यु हुइल बा ।
प्रहरीके अनुसार डडेल्धुराके परशुराम नगरपालिका–३ बुङाके ५६ वर्षीय नवराज पनेरुके पहिरोमे परके मृत्यु हुइल बा । भातकाँडास्थित खानेपानीे मुहान सफा करे गैल पनेरुके उप्परसे आइल पहिरोमे परके मृत्यु हुइल प्रहरी जनैले बा ।
ओस्टके शनिवारसे सम्पर्क बिहीन डोटीके दीपायल–सिलगढी नगरपालिका–७ पाकरीके ४८ वर्षीया चन्दा विष्ट अँट्वारके खोलासैन सामुदायिक बनुवामे मृत फेला परल प्रहरी जनैले बा ।
