कृषि यान्त्रिकारणके लाग जमा करल पैसा फिर्ता लैजैना कालिमाई सहकारीसे अनुरोध

पहुरा समाचारदाता
हसुलिया, २७ असार । कालिमाई बहुउद्देश्यीय सहकारीसे कृषि यान्त्रिकारणके सहकारीमे जमा हुइल पैसा फिर्ता लैजैना किसानहुकनहे अनुरोध करले बा ।

काठमाण्डौ जिल्ला प्रशासनमे दर्ता हुइल बाल शसक्तीकरण नेपालसे किसानहुकनहे ५० प्रतिशत अनुदानमे कृषि यान्त्रिकारण (पावर टिलर ओ पानी मोटर) वितरण कार्यक्रम आघे बह्रैना कहटी पत्र संख्या २०८०÷२०८१ चलनी नम्बर ०५ के कैलाली जिल्लाके कैलारी गाउँपालिका–५ गोबरैलामे रहल कालिमाई बहुउद्देश्यीय सहकारीहे सहकार्य कैना पत्र डेहल रहे । उहे पत्रके आधारमे कालिमाई बहुउद्देश्यीय सहकारीसे किसानसे आवेदन माग करल रहे ।

बाल शसक्तीकरण नेपालबारे बुझटी जाईबेर कैलाली जिल्ला प्रशासनमे कार्यक्रम संचालनके लाग अनुमति नैलेके अवैधानिक डेखल ओरसे यी सहकारीमे किसानहुकनसे कृषि उपकरण (पावर टिलर ओ पानी मोटर)के लाग जमा करल रकम फिर्ता कैना निर्णय हुइल सहकारीके सचिव किसुलाल चौधरी जनैले बटै ।

सहकारीसे विफेक रोज सार्वजनिक सूचना जारी करटी कृषि उपकरण (पावर टिलर ओ पानी मोटर)के लाग रकम जमा करुइया किसानहुकनहे प्रमाणसहित निवेदन पेश करके रकम फिर्ता लैजैना आग्रह करले बा ।