चैतन्य पाठशालासे कुसे औसीके अवसरमे बाबा सम्मान कार्यक्रम

पहुरा समाचारदाता
धनगढी, १७ भदौ । धनगढी उपमहानगरपालिका वडा नम्बर ५ स्थित शिवनगरमे रहल चैतन्य पाठशालासे कुसे औसीके अवसरमे बाबा सम्मान कार्यक्रम करले बा ।

चैतन्य पाठशालासे सोम्मारके रोज विद्यालय परिसरके एक कार्यक्रमके आयोजना करके बाबाके मुह हेर्नाके अवसर पारके बाबा सम्मान कार्यक्रम करलक हो ।

शिक्षक अभिभावक संघके अध्यक्ष ईश्वर गिरीके अध्यक्षतामे कैगिल कार्यक्रममे उहाँ कुसे औसीके महत्व ओ कुसके महत्वबारे जानकारी डेहल रहिट । विद्यालयके प्रिन्सिपल कटकबहादुर सिंह बाबाक मुह हेर्ना दिन पारके बाबा सम्मान कार्यक्रम कैलक बटैले । प्रकृतिके संरक्षण ओ संस्कृतिके सम्मानके शिक्षा ओ संस्कारके संगमहे ढेर महत्व डेटी यिही पहिले डाईक मुह हेर्ना दिनमे डाई सम्मान कार्यक्रमफे कैलक उहाँ जनैलै ।

आर्दश बाबा अपन लर्कनहे मजा शिक्षा दिक्षा डेहक लाग अपने दुःख कष्ट सहिके पैसाके जोहो कैटी रहल ओरसे बाबा कना भगवानके स्वरुप रहल उहाँ बटैलै । पाठशालासे बाबा सम्मान कार्यक्रममे गोरख बहादुर थापा, गोपीलाल कार्की ओ हेलुराम चौधरीहे सम्मान करले बा ।

बाबक मुह हेर्ना दिनके अवसरमे आयोजित कार्यक्रममे विद्यार्थी हिमेश जोशी, तेस्वी भट्टराई, स्मृति नाथ, आरोही चन्द, गीता सोव, रीजल कार्की, प्राथर्ना विक, उमेश ढाँट, सक्षम दाहाल, जेनी चौधरी ओ नेत्र कार्कीलगागत अपन प्रस्तुती डेखैले रहिट ।

कार्यक्रममे संचालन विन्दास बम करल रहिट । ओस्टेक यूवा कवि मोतीराम भट्टके जन्म जयन्ती परलक ओरसे उहाँक तस्वीरमे माल्यापर्णफे कैगिल रहे ।