सहकारी कृषकके सहयोगीः गाउँपालिका उपाध्यक्ष

पहुरा समाचारदाता
हसुलिया, २५ भदौ । कैलाली जिल्लाके कैलारी गाउँपालिका वडा नम्बर ७ रतनपुरमे रहल गोचाली कृषि सहकारी संस्था लिमिटेडके चौठा वार्षिक साधारणसभा मंगरके रोज एक कार्यक्रम विच सम्पन्न हुइल बा ।

कैलारी गाउँपालिकाके उपाध्यक्ष भगवतीकुमारी चौधरीके वरका पहुनामे हुइल कार्यक्रममे उहाँ सहकारी संस्था कृषकहुकनके भारी राहात हुइल बटैले बटी । कृषकहुक्रे सहकारीमार्फत मलखाद पैना, कृषि सामाग्री खरिदके लाग सहुलियत दरमे कृषि लोन पाई सेक्ना व्यवस्था हुइल उहाँ बटैली । कृषि प्रयोजनके लाग भारी–भारी बैंक छोट–छोट पुँजी लगानी नैकरठ, उहाँ कहली, ‘कृषकहुकनके छोट–छोट लगानीके लाग सहकारीसे लोन लेके कृषि कार्य करटी रहल बटै । सहकारीमे महिलाके सहभागी ढेर हुइल ओरसे उहाँहुक्रे लोन लेके टमान व्यवसाय करके आघे बह्रल उदाहरण बा ।’

आर्थिक अवस्था कम्जोर रहल महिला हिंसामे परल ओरसे आर्थिक सशक्तीकरणमे जोर डेहे पर्ना उहाँ बटैली ।
समयमे मलखाद नैपैना भारी समस्यसे किसानहुकन सामना करटी रहल ओरसे ओकर लाग गाउँपालिकासे सक्कु निकायसे गाउँपालिकासे पहल कदमी आघे बह्राइल गाउँपालिका उपाध्यक्ष बटैली ।

महिलाहुकनके टमान संघ संस्थासे मेरमेराइक सीप सिखाइल ओरसे ओकर सदुपयोग करटी आत्मनिर्भर बन्ना महिलाहुकनहे आग्रह करटी । गाउँपालिकासे टमान वडामे फरल फरक खेतीके लाग ब्लक बनाइल फे बटैली ।

कैलारी गाउँपालिकाके कार्यपालिका सदस्य सुन्दरीदेवी चौधरी देउसी भैलो खेलल रकमसे सुरुवाट करल यी सहकारी विस्तारे गोम्हानिया करटी आघे बह्रटी रहल बटैली । यिहीसे आघे दुध संकलन केन्द्र स्थापना करल मने दुध चिस्यानके लाग ट्रान्सफार्मर नैपाके बन्द कैना अवस्था आइल बटैली । यी सहकारीमे शेयर सदस्य बह्रैटी सक्कु जाने अप्नत्व महसुश करटी सहयोग करलेसे केल सहकारी आघे बह्रना उहाँ बटैली । कार्यपालिका सदस्यके नातासे अपने गाउँके डगरघाटके विकासके लाग सम्बन्धित निकाय डेलिगेसन जैना आवाज उठैना काम करटी रहल बटैली ।

वडा नम्बर ७ के निवर्तमान वडा अध्यक्ष कमल प्रसाद चौधरी वडा नम्बर ७ मे आलु पकेट क्षेत्र बनाइक लाग विया संकलन करे कञ्चनपुरसे बर्दियासम पुगल ओ अब्बे आलु क्षेत्र स्थापित हुइल बटैलै । सहकारीहे आघे बह्राइक लाग एकताके आवश्यक रहल उहाँ बटैलै ।

कैलारी गाउँपालिकाके वडा नम्बर ७ बाढ प्रभावित क्षेत्र रहल ओरसे सम्बन्धित निकायके विशेष ध्यान जाई पर्ना उहाँ कहलै ।
बाढके कारण बसन्ताके पुल पुहाइल ओरसे वडा कार्यालय जाइक लाग पवेरा पुरान बजार हुइटी जाई पर्ना बाध्य रहल ओरसे पुल, डगर निर्माण हाली कैडेना उहाँ आग्रह करलै ।

कैलारी गाउँपालिकाके सामाजिक विकास शाखा प्रमुख यगम कलेल अब्बेक समयमे सहकारी संस्था चलैना कर्रा रहल बटैलै । सहकारीसे कृषक, व्यवसायी ओ उद्यमीहुकनके सहयोगीके काम करल मने बहुट जैसिन व्यक्तिके कारण सहकारीप्रति आम मनैनमे गलत भ्रण सृजना हुइल बटैलै ।

उहाँ कहलै, ‘कैलारीमे ४६ ठो सहकारी संस्था रहल बा । तीन चार सहकारी बन्दफे हुइल बा । मने सहकारीके पैसाफे हमारे हो कना भावनासे मजासे हरहिसाव धारडेना, समय समय छलफल करटी नयाँ योजनाके साथे आघे बह्रलेसे सहकारीहे दिगो बनाइ सेक्जाइठ ।’

सहकारीके सदस्य निल्मा चौधरी पहिले खादके समस्या रहे अब्बे सहकारी मार्फत वितरण करटी रहल बटैली । किसानहुकनहे मजासे खाद उपलब्ध होए कना उद्देश्यसे यी सहकारीके स्थापना करल बटैली ।

कार्यक्रममे सहकारीके कोषाध्यक्ष लक्ष्मी चौधरी आर्थिक वर्ष २०८०÷०८१ सालके ३ लाख ४९ हजार २३४ रुप्या ५३ पैसा बराबरके आय व्यय विवरण प्रस्तुत करल रही ।

सहकारीके अध्यक्ष रामकृष्ण चौधरीके अध्यक्षतामे हुइल कार्यक्रममे सदस्य भुलुराम चौधरी स्वागत मन्तव्य व्यक्त करल रहिट । कलेसे संचालन सचिव भवनाथ चौधरी करल रहिट ।