अपने लगानीमे स्थानीय बनैलै कठ्वक ढुपरौहुवा

पहुरा समाचारदाता
धनगढी, ९ कुँवार । कैलालीके एक गाउँके स्थानीय तीन लाख रुपियाँ अपने लगानीमे कटैनी लडियामे कठ्वक ढुपरौहुवा (पुल) निर्माण करले बाटै ।

कैलारी गाउँपालिका–७ छटकपुर बसन्ताके स्थानीय काठे पुल निर्माण करल हुइट । गैल भदौमे आइल बाढसे लडियामे रहल पुरान काठे पुल पुहाइल रहे । पुल पुहाइलपाछे ओहोरदोहोरमे समस्या हुइल गाउँवासी कठ्वक पुल बनाइल स्थानीय जिया चौधरी जानकारी डेलै ।

उहाँ उ ठाउँमे पक्की पुल निर्माणके लाग डेढ दशकसे आवाज उठैटी अइलेसे फेन अब्बेसम सुनुवाइ नैहुइल गुनासो करलै । बाढसे पुल पुहाइबर महत्त्वपूर्ण कृषि सडकमे ओहोरदोहोर ठप्प हुइल रहे । धान काटके भित्र्याइना बेला आइल ओरसे गाउँवासी अपने लागतमे अपनहे कठ्वक पुल बनाइल जनाइल बा ।