यौनिक तथा लैंगिक अल्यसंख्यक सवाल ओ संचार माध्यमके भूमिका विषयक अन्तरक्रिया

पहुरा समाचारदाता
धनगढी,११ कुवाँर । यौनिक तथा लैंगिक अल्यसंख्यक सवाल ओ संचार माध्यमके भूमिका विषयक अन्तरक्रिया शुकके रोज धनगढीमे हुइल बा । सुदूरपश्चिम समाज कैलालीके आयोजना तथा यूएनडिपीके सहयोगमे यौनिक तथा लैंगिक अल्यसंख्यक सवालबारे संचारकर्मीनसे अन्तरक्रिया कैगिल रहे ।

कार्यक्रममे सहजीकरण करटी यौनिक तथा लैंगिक अल्पसंख्यक महासंघके केन्द्रीय कार्यक्रम संयोजक सिमरन शेरचन यौनिक तथा लैंगिक अल्पसंख्यक समुदायहे अभिन हेर्ना दुष्टि फरल रहल बटैली । यी समुदायभिटर टमान विशेषता रहल व्यक्ति रहल मने समाजसे हेर्ना धारण अक्के मेरिक रहल बटैली ।

उहाँ कहली, ‘सञ्चारकर्मीनसे समाचार प्रकाशन÷प्रशारण करेबेर कतिपय शब्द चयनमे ध्यान नैडेहेबेर समाजमेफे यौनिक तथा लैंगिक अल्पसंख्यक समुदायहे हेर्ना दृृष्टिकोण फरक बा । जेकर कारण समाजमे अपहेलना सहेपर्ना अवस्था बा ।’
यूटयुव च्यानल ओ स्रोत पुष्टि विनाके समाचार प्रकाशन कैना अनलाइनके कारण यौनिक तथा लैंगिक अल्पसंख्यक परेशान रहलफे कार्यक्रम संयोजक शेरचन बटैली ।

कार्यक्रममे नेपाल पत्रकार महासंघ कैलालीके अध्यक्ष हिमालय जोशी यौनिक तथा लैंगिक अल्पसंख्यक समुदायके सवाल ओ संचारमाध्यमके भूमिका विषयमे प्रस्तुतीकरण करल रहिट ।

कार्यक्रममे यौनिक तथा लैंगिक अल्पसंख्यकके मनिला न्यौपाने अपने बालकके रुपमे जन्म लेहल पाछे ७÷८ बरसपाछे फरक महसुश हुइटी जाके अब्बे महिलाके रुपमे स्थापित हुइल बटैली । अपन भोगाई सुनैटी यी अवधिमे विद्यालय, समाजलगायत घरपरिवारसेफे विभेद, अपहेलना, ंिहसा खेपे परल उहाँ बटैली ।

उहाँ कहली, ‘हम्रे प्रकाश चौधरीसे नम्मा समयसे प्रेम सम्बन्धमे जोरल रही । उ सम्बन्धहे स्थायी रुप डेना विषयमे सर्वोच्च अदालतसे हमार पक्षमे निर्णय करेबेर कैलारी गाउँपालिका वडा नम्बर ८ के वडा कार्यालयसे पहिल चो विवाह दर्ता करल ।’
अभिनफे यौनिक तथा लैंगिक अल्पसंख्यक समुदायभिटर पर्ना ढेर जाने नागरिक पैना कर्रा बा । मने अब्बे अपनेहुक्रे भर वडा कार्यालयसे प्रदान कैगिल विवाह दर्ताके आधारमे दुनु जाने राष्ट्रिय परिचयपत्रफे बनाइल उहाँ बटैली ।

यौनिक तथा लैंगिक अल्पसंख्यक महासंघके अध्यक्ष राजु लामा गैल बरस प्रदेश सरकारसे बजेट विनियोजन करल मने अब्बे यी समुदायके लाग बजेट विनियोजनमे विभेद करल आरोप लगैलै ।

कार्यक्रममे नेपाल पत्रकार महासंघके केन्द्रीय सदस्य भरत शाह, नेपाल पत्रकार संघ कैलालीके पूर्व अध्यक्ष जगत साउद, महासंघके जिल्ला सचिव प्रेम चौधरी, जिल्ला सदस्य भावना जोशी, प्रेस चौतरी नेपालके जिल्ला अध्यक्ष भानुभक्त आचार्यलगायत मन्तव्य राखल रहिट । कार्यक्रममे सुदूरपश्चिम समाजके जिल्ला अध्यक्ष करुणा नेपाललगायत यौनिक तथा लैंगिक अल्पसंख्यक समुदायके सहभागिता रहे ।