वनजंगलके संरक्षणसे केल वातावरण सन्तुलन बनाई सेक्जाईः गाउँपालिका उपाध्यक्ष

पहुरा समाचारदाता
हसुलिया, १३ भदौ । कैलारी गाउँपालिकाके उपाध्यक्ष भगवती कुमारी चौधरी वनजंगलके संरक्षणसे वातावरणहे सन्तुलन बनाई सेक्ना मद्दत मिल्ना बटैले बटी ।

दलित महिला अधिकार मञ्च कैलालीसे रेसिस्त परियोजना अन्तर्गत कैलारी गाउँपालिकामे रहल सामुदायिक वन उपभोक्ता समितिके पदाधिकारीहुकनहे रेडप्लस सम्बन्धी क्षमता अभिवृद्धि तालिम समापन कार्यक्रममे सम्बोधन करटी उहाँ वनके संरक्षण करलेसे वायुमण्डलमे रहल कार्बनडाइअक्साइडजैसिन ग्याँसहे सोसके उत्सर्जन घटैनासमेत मद्दत मिल्ना बटैली ।
वनके जथाभावी कटानी÷फँडानी, आगलागी, जंगल क्षेत्र, कृषि सडक आदिमे परिवर्तन करेबेर कार्बन उत्सर्जन बह्रटी जाईबेर जलवायू परिवर्तनमे टेवा पुगल उपाध्यक्ष बटैली ।

विगतके तुल्नामे असमान्य बर्षा, गमीमे ज्यादा गर्मी ओ जारमे ज्यादा जार हुइना कहल जलवायू परिर्वतनके असर रहल उहाँ बटैली ।

वन जंगलके संरक्षणसे कार्वन उत्र्सजनमे टेवा पुग्ना, वातावरणहे सन्तुलन बनैनाके साथे मानव स्वास्थ्यके फाइदाजनक रहल ओरसे सामुदायिक वन उपभोक्ता समुहहे वन संरक्षणमे ध्यान डेना आग्रह करली ।

तीन दिने रेडप्लस तालिममे जलवायु परिवर्तन विज्ञ लक्ष्मी प्रसाद भट्ट नेपालमे रेड प्लसके अवस्था, अवधारणा, दिगो वन व्यवस्थापन, सामुदायिक वनके कार्ययोजना, सामुदायिक वन व्यवस्थापनके प्रावधान, जलवायु परिवर्तन, दिगो वन व्यवस्थापन, स्थानीय समुदायसे सामुदायिक वन सम्बन्ध कार्य ओ सदुपयोग कैसिक कैनाके साथे रेडप्लसमे सामाजिक एवं वातावरणीय सुरक्षाके मापदण्ड विषय बस्तुमे छलफल करल रहे ।

समापन कार्यक्रममे उहाँ वनजंगल संरक्षणसे कार्वन उत्सर्जनमे टेवा पुग्ना ओरसे सामुदायिक वनके पदाधिकारीहुकन उ तालिम डेहल बटैलै ।

समापन कार्यक्रममे मिलन समुदायिक वनके अध्यक्ष टेकबहादुर परियार ओ नमुना सामुदायिक वनके अध्यक्ष रन्जिता चौधरी तीन दिनके तालिममे रेडप्लसके महत्वबारे जानकारी पाइल बटैलै । कार्यक्रममे दलित महिला अधिकार मञ्च कैलालीके बोर्ड कार्यसमिति लक्ष्मी भुलके अध्यक्षतामे हुइल रहे । कार्यक्रमके संचालन मञ्चके कार्यक्रम अधिकृत इन्द्रा दानपाली करल रहिट । तीन दिने तालिममे कैलारी गाउँपालिकामे रहल टमान समुदाययिक वनके १० जाने पुरुष ओ १५ जाने महिलालगायत मञ्चके सामाजिक परिचालक इन्द्र विककेफे सहभागिता रहे ।

ओस्टेक यिहीसे आघे तीन दिने रेडप्लस तालिम भजनी नगरपालिकामे संचालन हुइल रहे ।
रेडप्लस अग्रेजी शब्द हो । जेकर अर्थ वन विनाश ओ क्षयीकरण घटैना हो । जलवायु परिवर्तनमे योगदान पुगैना विविध ग्याँसके उत्सर्जनमे नकारात्मक असर पर्ना कार्वनलगायतके ग्याँसके भूमिका प्रदूषण÷उत्सर्जन बढैना कार्यमे वनके क्षयीकरण ओ विनाशके कारणसे करिब १७ प्रतिशत हिस्सा ओगटले बा ।