धनगढीहे सुन्दर ओ पर्यावरणमैत्री बनैना १८ हजार ४५५ रुखुवा लगागिल

पहुरा समाचारदाता
धनगढी, १४ कुवाँर । कैलालीके धनगढीहे सुन्दर ओ पर्यावरणमैत्री बनैना धमाधम वृक्षारोपण करजैटी बा ।
हरियाली प्रवद्र्धन कार्यक्रम अन्तर्गत वृक्षारोपण अभियानहे तीव्र रूपमे आघे बह्रैटी ‘हरित धनगढी’ अभियान अन्तर्गत वृक्षारोपण करजैटी बा ।

सुन्दर ओ हरियालीयुक्त धनगढी बनैना उद्देश्यसहित सुरु करल ‘हरित धनगढी’ अभियान कार्यक्रममे पछिल्का दिनमे नागरिक तथा टमान संघसंस्थाके सहभागिता बह्रटी गैल बा । धनगढी उपमहानगरपालिकाके अगुवाइमे हरियाली प्रवद्र्धन कैना ओ पर्यावरणमैत्री बनैना उद्देश्यसे ‘हरित धनगढी’ अभियानमे टमान प्रजातीके फलफूललगायतके टेल्ुवा लगाइल बा ।
२०७९ फागुनसे सुरु करल उपमहानगरपालिकाके यी अभियानमे टमान संघसंस्था, व्यक्तिके पहलमे हजारौँ बिरुवा लगाइल बा । हराभरा सहितके सुन्दर ओ पर्यावरणमैत्री बनैना धनगढी हरियाली प्रवद्र्धन कार्यक्रम सुरु करल धनगढी उपमहानगरपालिका जिन्सी शाखा प्रमुख कृष्णराज जोशी बटैैलै ।

शाखा प्रमुख जोशीके अनुसार हरियाली प्रवद्र्धन कार्यक्रम अन्र्तगत हालसम १८ हजार ४५५ टमान प्रजातिके बिरुवा ओ फलफूलके बोट लगाइल बा ।

अभियानमे आर्थिक वर्ष २०८०÷०८१ मे ११ हजार ३७६ टेलुवा तथा चालु आर्थिक वर्षके हालसम २५५ फलफूल ओ दुई हजार ३२४ टमान प्रजातिके बोट लगाइल बा । कलेसे धनगढीमे रहल ५४ सामुदायिक विद्यालयमे टमान फलफूलके चार हजार ५०० बोट लथाइल बा ।

लगाइल बोटमे अमरुट, आम, बडहर, लिच्ची, जाम, किम्बु, अमलालगायतके फलफूल रहल बटै । कलेसे गुलमोहर, चन्दन, धुपी, चाँदनी, खमारी, मेन्दुला, टाँकीलगायत रुखुवा ओ टमान प्रजातिके फूलके टेलुवा रहल बा ।

पर्यावरण संरक्षण कैना वृक्षारोपण अभियानमे हालसम टमान संघसंस्था ओ जनस्तरसे करके एक करोड ७६ लाख ४५ हजार ६०१ रुप्या सहयोग प्राप्त हुइल धनगढी उपमहानगरपालिका जनैले बा ।

पर्यावरण संरक्षण कैना वृक्षारोपण अभियानमे सबसे ढेर जाउलाखेल ग्रुप अफ इन्डस्ट्रिज ओ सूर्य नेपाल प्रालिसे ५०÷५० लाख ओ धनगढीस्थित नवजीवन सहकारी संस्था लिमिटेडसे १० लाख रुप्या सहयोग करल शाखा प्रमुख जोशी जानकारी डेलै ।
हराभारा सहितके सुन्दर ओ पर्यावरणमैत्री बनैना प्लाष्टिक बेचबिखन कैना समेत प्रतिबन्ध लगाइल धनगढी उपमहानगरपालिकासे हालसम धनगढीके मोहनापुल–अत्तरिया ६ लेन सडक, वनदेवी मन्दिर क्षेत्र, हुलाकी राजमार्ग, धनगढी विमास्थल सडक, चक्रपथ सडक, हसनपुर डिभोटी होटल आघे निसर्ग अस्पतालसे दाहाल चोक, मालपोत रोड, क्याम्पसरोड, मोहना आर्यघाटलगायतके क्षेत्रमे तारबारसहितके वृक्ष कवच (ट्री गार्ड) लगाके वृक्षारोपण करल बा ।

लगाइल टेलुवाहे नियमित मलजल ओ गोडमेल एवं संरक्षण कैना काम उपमहानगरपालिकासे करटी आइल धनगढी नगरप्रमुख गोपाल हमाल बटैलै । सुन्दर ओ पर्यावरणहे जोगैना उपमहानगरपालिकासे नागरिकहे सँगसँगे जोरल बा ।
उहाँ कहलै, ‘धनगढीहे सुन्दर ओ पर्यावरणमैत्री बनैना उपमहानगरपालिकासे ‘हरित धनगढी’ अभियान कहिके नियमित रुपमे वृक्ष कवच (ट्री गार्ड) सहित वृक्षारोपण ओ ओकर संरक्षण कैना काम करटी रहल बा ।

ट्री–गार्डमे कौनो संघसंस्था तथा व्यक्तिसे अपन कौनो सन्देश ओ दिवंगत आफन्त सम्मानमे नाम धारे चाहले प्रति ट्री–गार्ड पाँच हजार रुप्या लेना व्यवस्था करल बा ।’

जनसहभागितामे वृक्षारोपण अभियानहे प्राथमिकता डेहल उपमहानगरपालिकासे फरछवार सडकबीचके मिडियन ओ फुटपाथके दाँयावाँयालगायतके सार्वजनिक ठाउँमे वृक्षारोपण करटी आइल बा । यी अभियानमे धनगढीबासीके साथे स्वदेश तथा विदेशमे रहल अन्य भूभागके नेपालीसेफे साथ डेले बटै ।