पुनस्र्थापनाके आधा काम यिहे आर्थिक बर्षमे पुरा करबः मन्त्री थापा
पहुरा समाचारदाता
धनगढी, ९ कार्तिक । मुक्तकमैया महिला विकास मञ्चके १७औं वार्षिक साधारण सभा शुकके रोज एक कार्यक्रमके विच धनगढीमे सम्पन्न हुइल बा ।
मञ्चके जिल्ला अध्यक्ष सीमा चौधरीके अध्यक्षतामे हुइल कार्यक्रममे भूमि व्यवस्था कृषि तथा सहकारी मन्त्री विरबहादुर थापा प्रमुख अतिथि ओ संविधान सभा सदस्य हरि श्रीपाइली, कैलाली जिल्लाके सहायक प्रमुख जिल्ला अधिकारी किरण जोशी विशिष्ट पहुना रहल रहिट ।
उदघाटन कार्यक्रममे सम्बोधन करटी भूमि व्यवस्था कृषि तथा सहकारी मन्त्री विरबहादुर थापा पहिल चरणमे प्रमाणित हुइल सक्कु मुक्तकमैयाके पुनस्र्थापनाके आधा काम यिहे आर्थिक बर्षमे सेक्ना बटैले बटै ।
मुक्तकमैया परिचयपत्रसे बञ्चित रहल, पुनस्र्थापनाके बाँकी कामलगायत टमानके सवालके बारेमे स्थानीय तहके प्रमुखहुकनसे छलफल कैना कार्यक्रम तय हुइल ओ हाली बोलैना उहाँ बटैलै ।
मुक्तकमैया, कमलरी, मुक्तहलियाके पुनस्र्थापना सवाल लगायतके लाग प्रदेश सरकार बजेट विनियोजन करले बा,’मन्त्री थापा कहलै, ‘प्रमाणित हुसेकल हुकनहे लाग यिहे आर्थिक बर्षिक बर्षमे ओरैना मेरके काम आघे बह्रव । अपुग बजेट कहाँसे विनियोजन कैना हो मोर जिम्मा हो ।’
मन्त्री कहलै, ‘प्रदेश सरकारसे आब मुक्तकमैया, हलियाके लाग आवश्यकताके आधारमे जेकर घर बनैही पर्ना हो ओक्रे आधारमे सुरु करल बा । कौनौ ठाउँमे घर बनैना हो कलेसे सम्बन्धित स्थानीय तहसे छलफल करके आघे बह्रव ।’
एकफेरा फेरसे तथ्यांक सुरु करी, कैलाली, कञ्चनपुरलगायत पहाडी जिल्लाके कहाँ कहाँ मुक्तकमैया, कमलरी, हलिया बटै । काम आघे बह्राई ओइनके समस्या समाधन करटी मुक्त घोषणा करटी जाई ।
संविधान सभा सदस्य हरि श्रीपाइली पहिले मुक्तकमैया, कमलरी, हलियाके लाग नीति तथा कार्यक्रम बन्ना करल मने बजेट नैपरल मने अब्बेक सरकार केल सबसे ढेर बजेट विनियोजन करल बटैलै । सुदूरपश्चिम प्रदेशमे मन्दिरके नाउँमे पचासौ करोड रुप्या खर्च हुइल मने सीमान्तकृत वर्गके मुद्दाबारे सरकार गम्भीर नैडेखल उहाँ बटैलै । तहमे रहुइयाके दृष्टिकोणमे समस्याके कारण सीमान्तकृत वर्गके समस्या समाधान नैहुइल उहाँ बटैलै ।
गैरसरकारी संस्था महासंघ कैलालीके अध्यक्ष चेतमान साउद अभिनफे ढेर मुक्तकमैया परिचयपत्रसे बञ्चित हुइल बटैलै । संक्रमणकालिन समयमे परिचयपत्र वितरण करल ओरसे जे सूचनासे लग्गे रहे ओइनहे परिचयपत्र सहजुले मिलल ओ सूचनासे दुर रहल व्यक्ति परिचयपत्रसे बञ्चित हुइल उहाँ बटैलै ।
पत्रकार मनमोहन स्वाँर मुक्तकमैया पुनस्र्थापना कहे नैहुइल कना २३ बरससे उहे प्रश्न कैना बाध्यता रहल बा । अब्बेफे उहे प्रश्न बा । कहाँथेन कम्जोरी बा ओकर खोजी सरकारसे कैना जरुरी पर्ना बा ।
उहाँ कहलै, ‘आब मुक्तकमैया, कमलरी, हलिया अवसर हुइट कलेसे प्रदेश सरकार फेरसे एक फेरा सोचके आघे बह्रना जरुरी बा ।’
फाया नेपालके अध्यक्ष गोमा आचार्य सरकारसे मुक्तकमैया, कमलरी, हलियाहुकन उप्पर अन्याय करल बटैली । उहाँ कहली, ‘कमैया मुक्ती घोषणा कैलक ढाई दशक पुगे लागल बा । अभिन उहे आवाज उठना, सरकारसे सुनुवाई नैकैना विडम्बना हो । इच्छाशक्तिसे ढैके काम करलेसे पहिले ओराई पर्ना हो मने अभिन पुनस्र्थापनाके बाँकी काम अधुरा बा ।’ मुक्तकमैया महिला विकास मञ्च मानविय विकासमे काम करल बटैली ।
मुक्तकमैया समाजके केन्द्र्रीय अध्यक्ष पशुपति चौधरी मुक्तकमैया घोषणा करके ढेर मुक्तकमैया जग्गा पाइल मने अभिन सयौं मुक्तकमैया पुनस्र्थापासे बञ्चित रहल बटैलै ।
कमैया प्रथा उन्मुलन समाजके अध्यक्ष सीताराम चौधरी अपने मुक्तकमैया रहल बटैटी मुक्तीसे लेले कमैया पुनस्र्थापना लाग रातदिन खटकेफे अपने परिचयपत्रसे बञ्चित रहल बटैलै । उहाँ परिचयपत्रसे बञ्चित रहलहुकनके लगत लेहे पर्ना जरुरी बटैलै ।
कार्यक्रममे मुक्तकैया अगुवा रामफल चौधरी, उषा चौधरीलगायत मन्तव्य व्यक्त करल रहिट ।
मुक्तकमैया महिला विकास मञ्चसे कैगिल गतिविधि तथा प्रगती विवरणबारे मञ्चके जिल्ला कार्यक्रम संयोजक इन्द्र चौधरी प्रस्तुत करल रहिट । कार्यक्रममे स्वागत मन्तव्य मञ्चके सचिव सोनी चौधरी ओ संचालन जगदीश राना करल रहिट । कार्यक्रममे मञ्चके कार्य समितिके पदाधिकारी ओ साधारण सदस्यहुकनके सहभागिता रहे ।
