धनगढीमे उत्पादित फूला विमानमार्फत काठमाडौँ निर्यात

पहुरा समाचारदाता
धनगढी, १४ कार्तिक । कैलालीके धनगढी उपमहानगरपालिकासे फूला निर्यात सुरु करले बा ।

धनगढी उपमहानगरपालिकाके किसानसे उत्पादन करल सयपत्री लगायतके फूला विमानमार्फत काठमाडौँ निर्यात सुरु करल हो । धनगढी उपमहानगरपालिकाके किसानसे उत्पादन करल फूलाके प्रति किलोग्रामके विमानसे ९० रुप्या ढुवानी भाडा लेना हुइल बा । किसानहे प्रति किलोग्राम फूलामे धनगढी उपमहानगरपालिकासे ५० रुप्या ढुवानीमे अनुदान डेहल बा ।

धनगढी–काठमाण्डौँ २०० रुप्या प्रतिकिलोग्राम विमानके कम्पनीसे भाडा लेना करल हुइलेसेफे धनगढी उपमहानगरपालिकाके आग्रहमे ९० रुप्या केल भाडा लेना हुइल नगर प्रमुख गोपाल हमाल बटैलै । उहाँ कहलै, ‘धनगढी उपमहानगरपालिकासे फूलामे आत्मनिर्भरके अभियान सुरु करल रहे । गैल वर्षसे हम्रे आत्मनिर्भर हुइटी गैल बटी । धनगढीमे हम्रे बिक्री केन्द्र ओ चिस्यान डेले बटी । हम्रे बिजुलीके रकम डेना करल बटी ।’

धनगढी उपमहानगरपालिकामे आवश्यकतासे ढेर फूल उत्पादन हुइल हो । धनगढीसहित सुदूरपश्चिमके नागरिकहे ढेर हुइल फूला काठमाडौँ पठाई लागल हो । फल्वरीकल्चर यशोसियसनके सहकार्यमे काठमाडौँ फूला पठाई लागल हो ।
नगर प्रमुख हमाल कहलै, ‘हम्रे विमान कम्पनीसंग आग्रह करले बटी । २ सय रुप्या प्रति किलोके भाडा बा । हम्रे आग्रह करलपाछे ९० रुप्यामे फूल काठमाडौँ लैजैना सहमति हुइल बा । उहाँहुक्रे एक सय १० रुप्या छुट डेले बटै । विमानके भाडा ९० रुप्या परल बा । ९० रुप्यामेफे ५० रुप्या धनगढी उपमहानगरपालिकासे डेहक लाग बा । किसानके ४० रुप्या केल भाडा पर्ना हुइल बा ।’

धनगढी उपमहानगरपालिकासे गैल वर्ष किसानसे उत्पादन करल फूला खरिद करल रहे । बिक्री नैहुइल किसानके फूला उपमहानगरपालिकासे खरिद करल हो । यी बार भर विमानके ढुवानी भाडामे अनुदान डेके धनगढीमे उत्पादन हुइल फूला काठमाडौँ पठाई लागल बा । धनगढीके व्यवसायीहुकनहे प्लास्टिकके फूला तथा मालाके प्रयोग नैकैनासमेत नगर प्रमुख हमाल कहले बटै । धनगढीमे प्लास्टिक प्रतिबन्ध करल बा ।