कैलाली समन्वय समितिमे कांग्रेससे टीकाकुमारीहे उम्मेदवार बनाइल

पहुरा समाचारदाता
धनगढी, २८ कार्तिक । नेपाली काँग्रेस कैलालीसे जिल्ला समन्वय समिति कैलालीके प्रमुखमे टीका कुमारी चौधरी (भुल)हे उम्मेदवार बनैना प्रदेश समितिमे सिफारिस करल बा ।

आज बैठल बैठकसे प्रमुख पदमे उम्मेद्वार बनैना कैलारी गाउँपालिकाके वडा सदस्य चौधरीके नाम सिफारिस करल हो । उहाँ कैलारी गाउँपालिका वडा नम्बर २ से दलित महिला सदस्यमे निर्वाचित हुइल रहिट ।

कार्यसमितिके बैठकसे उहाँक एकल नाम सिफारिस करल जिल्ला उपसभापति खेमराज डंगौरा जानकारी डेलै । \

ओस्टेक करके जिल्ला सचिव केशव मिश्र पार्टीसे सर्वसहमतसे टीका चौधरी भुलहे सिफारिस करल बटैलै ।

२०७९ साल पुस २३ गते समन्वय प्रमुख पदम कलेलके निधन हुइलपाछे कार्यवाहक प्रमुखके भरमे समन्वय समिति चल्टी रहल बा ।
यहाँ नेपाली कांग्रेस, नेकपा एमाले, नेकपा माओवादी केन्द्र, नागरिक उन्मुक्ति पार्टीके जनप्रतिनिधिके मतदान करे पैही । समन्वय समितिके निर्वाचन अगहन १६ गते हुइटी बा ।