निसर्ग हस्पिटलसे मानसिक स्वास्थ्य साक्षरता कार्यक्रम सञ्चालन
पहुरा समाचारदाता
धनगढी, ७ अगहन । निसर्ग हस्पिटलसे विद्यालय स्तरीय मानसिक स्वास्थ्य साक्षरता कार्यक्रम सञ्चालन करले बा ।
धनगढीमे रहल हस्पिटलसे विद्यार्थीहे मानसिक स्वास्थ्यबारे सचेत बनैना यी कार्यक्रम सञ्चालनमे ल्यानल निसर्ग हस्पिटलके रिसर्च अफिसर गायत्री खनाल बटैली ।
मानसिक स्वास्थ्य साक्षरता कार्यक्रम शुकके धनगढीके पञ्चोदय माध्यमिक विद्यालयसे सुरु करल हो । अन्य विद्यालयमे समेत यी कार्यक्रम सञ्चालन कैना खनाल बटैली ।
निसर्ग हस्पिटलके मानसिक तथा नसारोग विशेषज्ञ डाक्टर प्रभात सापकोटासे मानसिक स्वास्थ्यबारे जानकारी कराइल रहिट ।
मानसिक स्वास्थ्य कहल के हो मानिसक समस्याके समाधान ओ समस्या आइलपाछे कैसिक बच्न कना उपायके बारेमे डा. सापकोटासे जानकारी करैलै ।
यी समस्यासे ढेर प्रभावित हुइना उमेर समूह, मानसिक रोगके संकेतबारे उहाँ सहभागी शिक्षक ओ विद्यार्थीहे प्रशिक्षण डेलै ।
कार्यक्रममे निसर्ग हस्पिटलके मानसिक स्वास्थ्य परामर्शदाता सुशील चटौतफे मानसिक रोगबारे सचेत करैनाके साथे बच्न उपायके बारे बटैलै ।
निसर्ग हस्पिटलसे बेलाबेलामे समाजिक स्थरमे टमान जानकारीमूलक कार्यक्रम करटी आइल बा ।
मानसिक समस्या सम्बन्धी सचेतना कार्यक्रम पछिल्का समय एकदम आवश्यक रहल ओरसे विद्यालय स्तरमे करल निसर्ग हस्पिटलके सूचना अधिकारी रोहित गिरी बटैलै ।
कार्यक्रममे हस्पिटलके मानसिक रोग विशेषज्ञ डाक्टर प्रभात सापकोटा, हस्पिटलके मानसिक स्वास्थ्य परामर्शदाता सुशील चटौत, रिसर्च अफिसर गायत्री खनाल, सूचना अधिकारी रोहित गिरीलगायत हस्पिटलके अन्य कर्मचारी ओ विद्यालयके शिक्षक, विद्यार्थीके उपस्थिति रहे ।
