सुदुरपश्चिम महोत्सवके १८ औ संस्करण अगहन २२ गतेसे

पहुरा समाचारदाता
धनगढी, ११ अगहन । सुदुरपश्चिम महोत्सवके १८ औ संस्करण अगहन २२ गतेसे पुस २ गतेसम हुइना जनागिल बा । २०६३ सालसे धनगढीमे हुइटी आइल महोत्सव यी सालफे अगहन २२ गतेसे वडा नं. १ पशुपति टोलमे संचालन हुइना कैलाली उद्योग वाणिज्य संघसे मंगरके रोज पत्रकार सम्मेलनके कैके जानकारी डेले बा ।

सुदूरपश्चिम प्रदेशके पर्यटन, कृषि ओ उद्योग व्यापारके विकास तथा विस्तारके साथे संस्कृती ओ कलाके प्रवद्र्धन करटी यी क्षेत्रके समग्र विकासके सम्भावनाहे उजागर करके आर्थिक, सामाजिक प्रतिकुलता ओ विषम सामाजिक परिस्थितिसे गुज्रटी रहल उद्योग व्यवसायहे पुनसर््थापित कैना महोत्सव उपलब्धी मुलक हुइना विश्वास सहित महोत्सव हुई लागल आयोजक जनैले बा ।

वृहत व्यवसायिक कृषि प्रदर्शनी ओ कृषिमे आइल प्रविधिहे व्यवसायमे जोरेक लाग प्रदर्शनीमे विशेष जोड डेहल संघके अध्यक्ष पुष्पराज कुवँर जनैलै ।

सास्कृतिक रुपमे धनी सुदुरपश्चिमके कला संस्कृतिके संरक्षण संगे यी क्षेत्रके कला संस्कृतिमे सम्भावना रहल ओ योगदान डेहल कलाकारहुकनहे स्टेजमे प्राथमिकता डेना जनागिल बा । महोत्सवमे यी क्षेत्रके उद्यमी व्यवसाय उत्पादनहे प्राथमिकता डेनाके साथे नेपाल भरसे अइना उद्योगी व्यवसायीहुकनहे सम्मानित रुपमे सहभागिता करैना कहल बा ।

सुदुरपश्चिमके परिकार सहितके महोत्सव स्थलमे खाना खाजाके स्टल रना बा । जेकर सरसफाइ तथा उत्कृष्ट व्यवस्थापनके लाग सरोकार निकाय विच समन्वय करटी रहल संघ जनैले बा ।
महोत्सवमके व्यवसाय तथा दर्शकहुकनके सुरक्षाहे ध्यान डेके विमाफे कैना बा कलेसे भैपरि अइना विपदके पूर्व तयारीके लाग दमकल, प्राथमिक उपचार आदी तयारी अवस्थामे रना जनागिल बा ।

महोत्सवमे अनुमानित ३ करोडके लगानीमे उत्कृष्ट रुपमे सम्पन्न कैना बा कलेसे महोत्वसमे उद्योगी व्यवसायके १५ करोड बरावरके कारोवार हुइना अनुमान करल संघ जनैले बा ।
महोत्सवमे कृषि, जडिवुटी, हस्तकला, फर्निचर, अटोमोवाइल्स, गारमेन्ट, इलेक्टोनिकल, होटल ओ सूचना प्रविधि करके ५०० जटरा स्टल रना कहल बा । ओम्नेसे अब्बेसम करिव ९५ प्रतिशत स्टल वुक हुसेकल ओ महोत्सवके करिव ७० प्रतिशत काम सम्पन्न हुसेकल अध्यक्ष कुवँर जनैलै ।

महोत्सवमे स्थानीय उत्पादन ओ महिला उद्यमीहे प्रोत्साहन करल बा कलेसे यी वर्षके महोत्सवमे करिब ५ लाख व्यक्तिसे अवलोकन कैना अनुमान कैगिल बा । सुदुरपश्चिमवासीसे गर्वके साथ पर्वके रुपमे मन्टी आइल सुदुरपश्चिम महोत्सव व्यापार व्यवसायके जगतमे उत्कृष्ट ओ अनुपम नमुनाके रुपमे रना संघसे विश्वास लेले बा ।

महोत्सवहे भव्यरुपमे सम्पन्न कैना मुल आयोजक समिति सहित २९ उप समिति गठन हुइल बा । सुरक्षाके दृष्ट्रिकोणसे पूर्ण रुपमे अत्याधुनिक सिसि क्यामरासे निरिक्षण कैना, निजि ओ सरकारी सुरक्षाकर्मीहुकनके व्यवस्था कैना संघ जनैले बा ।
वालवालिका ओ खेलमे रुचि रहल दर्शकहुकनके रुचिहे प्राथमिकता डेके यी महोत्सवमे नयाँ एक्युरेअमफे रहल जनागिल बा ।
१८ औ संस्करणमेफे महोत्सवके टिकटके कुछ रकम सामाजिक क्षेत्रके विषयमे छुट्टाइइल जनागिल बा । सम्मृद्ध महिलाके लागः आर्थिक सामाजिक सशक्तिकरणके लाग प्रतिटिकट रु.२ छुट्टाइल बा कलेसे प्रति टिकट रु. ५ रुप्या संघके विपद व्यवस्थापन कोषमे जम्मा कैना बा ।

ओस्टेक करके समाज विकासके चुनौतिके रुपमे रहल लागु दुव्यसन विरुद्धके अभियानके लाग प्रति टिकट रु. १ छुट्टाइल बा । महोत्सव अवलोकनके लाग विद्यार्थीनहे रु.५० टिकटदर धारल बा कलेसे सर्वसाधारणहे रु.१०० धारल बा । कलेसे जेष्ठ नागरिक ओ फरक क्षमता रहलहे महोत्सवमे प्रवेश निशुल्क कैना बा ।

यी महोत्सव कैलाली उद्योग वाणिज्य संघके केल महोत्सव नैहुके सुदुरपश्चिमके पूर्वरुपमे विकास हुसेकल ओरसे सक्कु पत्रकार तथा संचारकर्मी, सक्कुहनसे रचनात्मक सहयोग ओ सुझावके अपेक्षा करले बाटी । यी १८ औ संस्करणमे मुख्य प्रायोजक कृषि विकास बैकं लिमिटेड, संरक्षक नेपाल उद्योग वाािणज्य महासंघ ओ नेपाल उद्योग वाणिज्य महासंघ सु प प्रदेश, मुख्य प्रवद्र्धक सुदुरपश्मि प्रदेश सरकार ओ प्रवद्र्धकके रुपमे कैलाली जिल्लाके सक्कु स्थानीय तह रहलफे पत्रकार सम्मेलन मार्फत जानकारी करागिल बा ।

महोत्सवके उदघाटन प्रधानमन्त्री केपी शर्मा ओलीसे करैना संघ जनैले बा । प्रधानमन्त्री अइलेसे १० किलो मालासहिट १० बुँदे मागफे रख्ना अध्यक्ष जनैलै ।

गौरीफन्टा नाकाहे अन्तर्राष्ट्रिय नाकाके रुपमे विस्तार करेपर्ना, प्रदेश प्रदर्शनी स्थल निर्माण करेपर्ना, सेज स्थापना, चीनसंग जोरना नाका खोले पर्ना, प्रदेश साँस्कृतिक संग्रहालय निर्माण लगायतके माग पूरा हुई नैसेकल संघ जनैले बा ।