राष्ट्रिय पुस्तक प्रदर्शनी तथा शैक्षिक महोत्सव हुइना
पहुरा समाचारदाता
धनगढी, १४ अगहन । नेपाल पुस्तक तथा स्टेशनरी व्यवसायी संघके आयोजनामे नवौं वृहत राष्ट्रिय पुस्तक प्रदर्शनी तथा शैक्षिक महोत्सव–२०८१ हुइना हुइल बा ।
‘सामाजिक रुपान्तरणके लाग शिक्षामे नयाँ अभियान’ कना मूल नाराके साथ सुदूरपश्चिम प्रदेशके पर्यटन, शिक्षा, स्टेशनरी, मसलन्द तथा छपाई व्यवसायके विकास तथा संस्कृतिके प्रवद्र्धनके साथे यी क्षेत्रमे रहल अन्य शिक्षासँग सम्बन्धित विकासके सम्भावनाहे उजागर कैके शैक्षिक रुपसे सुन्दर सुदूरपश्चिमहे आर्थिक रुपमे समेत समुन्नत सुदूरपश्चिमके निर्माणमे टेवा पुगैना उद्देश्यके साथ महोत्सव हुइना शकके रोज पत्रकार सम्मेलन कैके जनागिल बा ।
महोत्सव यिहे पुस ९ गतेसे १५ गतेसम धनगढी उपमहानगरपालिका–१, पशुपतिटोलमे हुइना आयोजक जनैले बा ।
महोत्सवसे यी क्षेत्रके शैक्षिक, आर्थिक एवम् सामाजिक विकासमे सकारात्मक प्रभाव परना तथा देश ओ सुदूरपश्चिमके शैक्षिक उन्नत विकासके लाग टेवा पुग्ना आशा लेहल संघके अध्यक्ष भीम पडाल बटैलैं । उहाँ कलैं, “उ वृहत प्रदर्शनी तथा महोत्सव यी क्षेत्रके शैक्षिक, आर्थिक, सामाजिक तथा पर्यटनके सम्भावनाहे उजागर करना प्रतिबद्ध रहि ।” उहाँ यी महोत्सवसे देशभर रहल प्रकाशक, स्टेशनरी वितरक तथा मसलन्द सामग्री ओ शिक्षासँग सम्बन्धित सम्पूर्ण सरोकारवाला महानुभावहे एकीकृत कैके यी क्षेत्रके समृद्ध विकासमे महत्वपूर्ण भूमिका रहना विश्वास व्यक्त करलैं ।
महोत्सवमे सुदूरपश्चिम प्रदेशके साथे देश ओ विदेशमे रहल प्रकाशक, स्टेशनरी वितरक, शैक्षिक संस्था, मसलन्द सामग्री ओ शिक्षासँग सम्बन्धित निकायके एक सय ५० स्टल रहना आयोजक जनैले बा । महोत्सवहे दुई लाख दर्शक अवलोकन करनाके साथे ५ करोड ढेकरे कारोबार हुइना अनुमान करल अध्यक्ष पडाल बटैलैं । अस्टेक, महोत्सव आयोजन करेक लाग लगभग दुई करोड ढेर खर्च हुइना प्रक्षेषण करल उहाँ बटैलैं ।
महोत्सवहे सफल कराइक लाग टमान विभिन्न उपसमिति निर्माण कैके तयारी फेन सुरु होसेकल ओ स्टल बुकिङके काम फेन सुरु होसेकल जनाइल बा । महोत्सव अवलोकनके लाग विद्यार्थीहे ५० रुप्या टिकटदर बा कलेसे सर्वसाधारणहे १०० रुप्या बा । अस्टेक, जेष्ठ नागरिक ओ फरक क्षमता रहल व्यक्तिहुकनहे महोत्सवमे प्रवेश निःशुल्कके व्यवस्था रहल आयोजक जनैले बा ।
शैक्षिक महोत्सवमे सुदूरपश्चिमके कला संस्कृतिके संरक्षणसंगे यी क्षेत्रके कलाकार ओ राष्ट्रिय ख्यातिप्राप्त कलाकारहुकनके प्रस्तुति रहि कलेसे विद्यालय ओ विद्यार्थीहुकनके लाग फेन टमान सांस्कृतिक तथा शैक्षिक कार्यक्रमके आयोजना हुइना जनाइल बा । सुदूरपश्चिमके परिकारसहितके महोत्सव स्थलमे खाना खाजाके स्टल रहि कलेसे व्यवसायी तथा दर्शकहुकनके सुरक्षाहे ध्यान कैके बिमा फेन करना अध्यक्ष पडाल बटैलैं ।
अध्यक्ष पडाल शैक्षिक महोत्सवहे भव्य ओ सभ्य रुपमे सफल बनाक लाग आम सुदूरपश्चिमवासी, सक्कु राजनीतिक दल, सरकारी तथा गैरसरकारी संस्था, पत्रकार, विद्यार्थी, उद्यमी व्यवसायीहुकनहे अनुरोक करले बटैं ।
कार्यक्रममे कैलाली उद्योग वाणिज्य संघके अध्यक्ष पुष्पराज कुँवार शैक्षिक महोत्सवहे सफल कराइक लागल अपन रफसे सेक्ना सहयोग करना प्रतिवद्धता व्यक्त करले रहैं । उहाँ यी महोत्सवके सफलताके शुभकामनासमेत व्यक्त करले रहैं ।
