जिसस प्रमुख टीकाकुमारीसे सपथ तथा पदभार ग्रहण

पहुरा समाचारदाता
धनगढी, १६ अगहन । कैलाली जिल्ला समन्वय समितिके प्रमुखमे निर्वाचित टीकाकुमारी चौधरी(भुल) सपथ तथा पदभार ग्रहण करले बाटी ।

नवनिर्वाचित प्रमुखहे जिल्ला अदालत कैलालीके न्यायधिश दण्डपाणी लामिछाने एक कार्यक्रमके विच गोपानियताके सपथ खवाइल रहिट । उहे अवसरमे बोल्टी न्यायधिश लामिछाने जिल्ला समन्वय समितिके प्रमुखके भारी जिम्मेवारी रहल ओरसे सक्कु पालिकासे समन्वय कैके आघे बह्रना सल्लाह डेहल रहिट । उहाँ कहलै, ‘जिल्ला समन्वय समितिके हरेक क्षेत्र हेरेपर्ना रहठ । अदालतसे लेना सहयोग हम्रे लेव ओ हम्रहिनसे लेना सहयोग उहाँ लिही ।’

गोपनीयताक सपथ ग्रहण कार्यक्रमम प्रदेश निर्वाचन कार्यालयक प्रमुख प्रेमराज भट्ट, कैलारी गाउँपालिकाक अध्यक्ष राजसमझ चौधरी, गाउँपालिका उपाध्यक्ष भगवतीकुमारी चौधरी, जिल्ला प्रहरी कार्यालय कैलालीक प्रमुख एसपी पदमबहादुर विष्टलगायतक सहभागी रह ।

वसहेक कैख जिसस कैलालीक प्रमुख टीकाकुमारी चौधरी (भुल) आजु पदभार ग्रहण कैल बाटी । उहाँहन जिसस कैलालीक उप प्रमुख खगराज भुषाल पदभार कराइल रल्ह ।

पदभार ग्रहण करटी उहाँ जिल्ला समन्वय समिति एक ठो समन्वय करके आघे बह्रना निकाय रहल ओरसे सक्कु जनहनसे समन्वय करके आघे बह्रना उहाँ बटैली । उहाँ कहली, ‘जिल्लामे रहल सक्कु स्थानीय तहसे समन्वय करके अग्रहहुकनके सल्लाह अनुसार बह्रजाई । महिला, दलित, जनजातीके समस्या बा । उ समस्या पहिचान करके आघे बह्रजाई ।’
ओस्टेक करके जिल्ला समन्वय समिति कैलालीके प्रमुखमे निर्विरोध निर्वाचित टीकाकुमारी चौधरी भुलहे अँटवारके रोज प्रमाणपत्र वितरण करल रहे ।

उहाँहे प्रमाणपत्र हस्तान्तरण प्रदेश निर्वाचन अधिकारी प्रेमराज भट्ट करल रहिट । नागरिक उन्मुक्ति पार्टीके रुपमती डगौरा थारू जिसस प्रमुखमे डेहल उम्मेदवारी फिर्ता लेहलपाछे कांग्रेसके चौधरी निर्विरोध निर्वाचित हुइल रहिट ।

भुल कैलारी गाउँपालिका–२ से दलित महिला सदस्यमे विजयी हुइल रहिट । एमालेके समर्थनमे उहाँ जिसस कैलालीके प्रमुखमे उम्मेदवारी दर्ता कराइल रहिट ।
तत्कालीन जिल्ला समन्वय समिति प्रमुख पदमबहादुर कलेलके २०७९ पुस २३ गते निधन हुइलपाछे यहाँ उपनिर्वाचन हुइलक हो ।