सामुदायिक वनसे सम्मान कार्यक्रम
पहुरा समाचारदाता
धनगढी, १६ अगहन । कैलाली जिल्लाके कैलारी गाउँपालिका वडा नम्बर ७ मे रहल दुईं ठो सामुदायिक वनसे अनाथ, अपाङता रहल ओ जेहेन्दार विद्यार्थीनहे सम्मान करले बा ।
सुइटी सामुदायिक वन उपभोक्ता समुह ओ खौरहुवा शिव सामुदायिक वनसे अँटवारके रोज एक कार्यक्रमके विच सम्मान करल हो । सामुदायिक वनसे असक्त अपाङता रहल सुनैना चौधरीहे ब्ल्याङकेट ओ गरम कपरा, ट्रकसुट सहयोग करल रहे । कैलारी गाउँपालिका वडा नम्बर ७ स्थित राष्ट्रिय आवि कक्षा कक्षा ८ मे अध्ययनरत रहल जेहेन्दार विद्यार्थी निरुता चौधरीहे स्कूल झोला, ट्रयाकसुट, गरम कपरा, स्टेशनरी सामान हस्तान्तरण करल बा । उहे विद्यालयके कक्षा ६ मे पह्रना अनाथ विद्यार्थी दुखनी चौधरीहे ब्ल्याङकेट, स्कूल झोला, ट्रयाकसुट, गरम कपरा, स्टेशनरी सामान हस्तान्तरण कैगिल बा ।
वडा नम्बर ७ स्थित बागेश्वरी बालविकासमे अध्ययनरत रहल जेहेन्दार विद्यार्थी स्मृति चौधरीहे स्कूल झोला, ट्रयाकसुट, गरम कपरा, स्टेशनरी सामान हस्तान्तरण करल बा ।
ओस्टेक करके १५ जाने सामान्य परिवारके १५ जाने विद्यार्थीनहे शैक्षिक सामाग्री हस्तान्तरण कैगिल बा ।
सुइटी सामुदायिक वनके अध्यक्ष रामचरण चौधरीके अध्यक्षतामे हुइल कार्यक्रममे प्रदेश सभा सदस्य तथा पूर्व अर्थमन्त्री घनश्याम चौधरी बरका पहुना रहल रहिट । ओस्टेक करके विशिष्ट पहुनामे कैलारी गाउँपालिका–७ के वडा अध्यक्ष दिपेन्द्रबहादुर बम, सबडिभिजन वन कार्यालयके जमदार कालिराम चौधरी, सिएफसिसि बसन्ताके अध्यक्ष रमेश चौधरी, पहुनामे बसन्ताके भल्मन्सा धनीराम चौधरी, निवर्तमान भल्मन्सा जियाराम चौधरीलगायत उपस्थिति रहे ।
कार्यक्रममे प्रदेश सभा सदस्य तथा पूर्व अर्थमन्त्री घनश्याम चौधरी, सिएफसिसि बसन्ताके अध्यक्ष रमेश चौधरी, समिक्षा महिला बहुउद्देश्यीय सहकारी संस्थाके अध्यक्ष उर्मिला चौधरी, भुइयाँफाटा सामुदायिक वनके अध्यक्ष विष्णुदेवी चौधरी, राष्ट्रिय आविके शिक्षिका सविना चौधरी, बागेश्वरी वालविकासके शिक्षिका सावित्री चौधरीलगायतसे मन्तव्य राखल रहिट । कार्यक्रमके संचालन निलु चौधरी ओ स्वागत मन्तव्य खौरहुवा सामुदायिक वनके अध्यक्ष लेखराम चौधरी व्यक्त करल रहिट ।
