जिसस प्रमुख टीकाकुमारीहे कैलारीमे बधाई तथा सम्मान

पहुरा समाचारदाता
हसुलिया, १७ अगहन । कैलाली जिल्ला समन्वय समितिके प्रमुख टीकाकुमारी चौधरी (भुल)हे कैलारी गाउँपालिकासे बधाई तथा सम्मान करले बा ।

सोम्मारके रोज गाउँपालिकामे आयोजित कार्यक्रममे उहाँहे बधाई तथा सम्मान कार्यक्रम कैगिल हो । उहाँहे गाउँपालिका अध्यक्ष राजसमझ चौधरी, गाउँपालिका उपाध्यक्ष भगवतीकुमारी चौधरी, प्रमुख प्रशासकीय अधिकृत खगेन्द्रराज जोशी, सक्कु वडाके अध्यक्षहुक्रे, कार्यपालिका सदस्यहुक्रे, टमान शाखाके प्रमुख, तथा कर्मचारीहुक्रे नवनिर्वाचित जिसस प्रमुख टीकाकुमारी चौधरीहे बधाई डेटी खादा मालासे सम्मान करल रहिट ।

उहाँ स्थानीय चुनावमे कैलारी गाउँपालिका वडा नम्बर २ से निर्वाचित कार्यपालिका सदस्य रहिट । यिहे उपनिर्वाचनसे उहाँ जिल्ला समन्वय समिति कैलालीके प्रमुखमे निर्वाचित हुइल बाटी । कार्यक्रममे बोल्टी उहाँ जिल्लामे रहल सक्कु स्थानीय तहसे समन्वय करके आघे बह्रना बटैली ।